Tatlong tula para kay Chad Booc
1. Si Chad at mga Bakwit
Ni Ibarra Banaag
Hininga ang naghihiwalay sa katawang lupa.
Kaluluwa ang nag-uugnay sa diwa at kataga.
Gunita sa himaymay na siyang bulong sa panata.
Tuwing may dugo at luha na dadampi sa madla.
Matamang nangungusap ito sa kamalayan.
Nagsasabing ang buhay ay daluyan lamang.
Kasangkapan ng karunungan at pagmamahal.
Sukdang pumikit ang mata at ito’y mabuwal.
Sino bang tunay na magbibigay ng paghanga.
Di ba’t yaong mga Lumad na pinaglingkuran nila.
Patotoong mababakas sa hinagpis at palahaw,
Kundi pisnging binasa ng dusa at pusong naulila.
Tulad nila ay kislap ng batis sa silong ng buwan.
Bulalakaw sa hinaing at pangarap ng nanibugho.
Ilog na tumatalunton sa malawak na karagatan.
Puno na nagbibigay ng pananalig at kanlungan.
Balabal-ritwal at kasuutan ng mga katutubo.
Awit, sayaw, huni at galaw ng mga ninuno,
Dayuhang narahuyo sa diwatang sinusuyo.
Tadhanang naghatid ng pag-ibig at pagsuyo.
Hindi ka namin ililibing kagaya ng ‘yong hiling,
Kasama ng apat pa, binhi kang sa lupa ikakalat.
Sa lupang pangako kawangis mo’y didiligin
Ng sumibol at yumabong adhikain na hangad.
— Pebrero 26, 2022
2. Hindi lumuluha ang demonyo
(Hinggil sa ‘No tears for terrorists’ ni Dr. Lorraine T. Badoy)
Ni Marlou Abaja
Walang balon ng awa
Walang batis ng malasakit at hinagpis
Walang bukal ng buhay ang katawan
Ng demonyong nagbabalatkayong tao
Walang aagos na luha ng dalamhati
Walang luha ang demonyo
Tinuyo ng apoy ang bawat patak
Bagkus ay pagdiwang sa itim niyang budhi ang nangingibabaw
Sa pagpanaw ng pinaslang na bayani
Walang luha ang demonyo
Kundi galak na hindi makatao.
3. Titser Chad
Ni Raymund B. Villanueva
Pauwi pa lamang mula sa rali–
nag-kober at sumali–
nang malaman ang masamang balita
mula sa lalawigan ng ginto’t dugo
Ayaw munang maniwala
Bakit ba? Napakasama
nakakapanghina
Ngunit possible, bakit hindi?
Madalas talagang maging martir
ang mga dati nang bayani
Adya yata, sa UP ako dumaan pag-uwi
(Bilin ng asawa’y bumili ng lupa sa maghahalaman
sa C5.) Pagliko kanina sa University Avenue
lumingon sa kanan at tinanaw hanggang dulo
ang istatwang dipa’t tingala.
Sa ngayong naluluhang mata
dahil sa iyo, Titser Chad,
si Oble’y tumangkad pa yata.
–3:01 n.h.
25 Pebrero 2022
Lungsod Quezon