Alipin
Ni Ibarra Banaag
Magbalikwas, habang ang baga ay nagniningas!
Lumaban, habang kumikirot ang hapdi ng sugat
Kumilos, habang ang gabi ay gising sa huni ng kulisap
Bumangon, habang ang araw ay tirik sa maghapon.
Manindigan, habang ang liwanag ay naririyan
Pumanig, sa mapag-adyang uri ng sangkatauhan
Magpasya, habang tumitibok ang puso
Umibig, habang ang bayan ay di naglalaho.
Magalit, kung kamangmangan ay nangingibabaw
Bumatikos, sa piging ng mga nagbabalatkayo
Usigin, ang pasimuno ng atrasadong pananaw
Mapoot, sa nagtataguyod ng kamangmangan.
Umasa, na sa yungyong ng dilim ay may hangganan
Magsikhay, subukang pandayin ang kinabukasan
Manguna, sa tuwing may nag-aalinlangan
Tumindig, kung ang marami ay pinanghihinaan.
Mamuhi, kung sa dibdib nagmaliw na’ng paglaban
Pumalahaw, sa gitna ng libong nagbibingihan
Tumangis, kung lumuwag ang kapit sa pinaglalaban
Magbunyi, sa tuwing may humahawak ng sandata.
Manibugho, sa sanlakasang nagpapatuloy
Ikarangal, ang di mapag-imbot nilang prinsipyo
Katahimikan, sa bawat nagbubuwis ng buhay
Humayo, kung naghahangad ng pagbabago.