Para sa iyong ika-29 na kaarawan, Hadji
Muli kong nadama
Sakit ng isang gunita
Ang hirap ng isang ina
Sa pagsilang ng anak na sinta.
Makalibong sakit pa pala
Ang siyang aking madarama
Nang ikaw, anak, ay iwinala
Dulot ng kalupitan ng iba.
Inalagaan kitang mabuti
Mula pagkabata at paglaki
Sa kamay ng masamang budhi
Iwinala nang walang saksi.
Bawat pintig ng puso
Dulot ay pagdurugo
Dapat lamang na kumibo
Ang pag-asa ‘wag isuko.
Anak, kung saan ka man
Sa hukay o sa kulungan
Pilit kitang hahanapin
Sa abot ng kaya ay gagawin.
At kung itulot ni Bathala
Tayo ay muling magkita
Hahaplusin ang ‘yong mukha
Yayakapin lahat ng dusa.
Di ka na hahayaan pa
Mawaglit sa ‘king mga mata
Iduduyan sa aking kandungan
Buburahin pait ng nakaraan.
Anak, nasaan ka na?
-24 Abril 2025
= = = = = = =
Ang makata ay ang ina ng nawawalang si Bazoo (Hadji) de Jesus. Ngayong araw ang ika-29 na kaarawaan ng anak na dinukot ng mga hinihinalang ahente ng gubyerno, kasama si Dexrer Capuyan, noong ika-28 ng Abril 2023
