Lanzones at Mangosteen (o sa pitong kabataang Tausug)

Ni Pia Montalban

 

Nanlalagkit ang dagta,

kahit anong tamis

ng kabataang hinog

at di huhulas

ang lilang lamog

mula sa mga nilagusan

ng pulbura’t tingga.

Pitong bungang pinitas,

dagta’y pula ang tagas…

Pitong kabataang mag-uuma

yakap-yakap mga kahon ng bunga,

ngayo’y ikakahon silang terorista—

A-bu sa-yaff!

 

Ngunit gumugulong sa kalsada

ang nabitawang mga bunga

at magsasalaysay lamang ito

ng tapat na mga tala.