Ni Ibarra Banaag
Kami ay nakikiramay,
Kay Huling, Juan at Maria,
Sa pumanaw na hustisya,
At kinitil na demokrasya.
Nakikidalamhati tayo,
Sa pagyao ng proseso,
Na marinig ng taong-bayan,
Nagpatakas sa magnanakaw.
Labis ang ating pighati,
Sa lumalang pagkakahati,
Sa pagitan ng matuwid,
At ng nagbubulagbulagang saksi.
Ang sabwatan ng kawatan,
At tau-tauhang bulwagan,
Mga nabusalang huwes,
Sa kumunoy nagpulasan.
Wala nang maaasahan pa,
O pagdudulugan ng pag-asa,
Sa pulpito ng tipaklong,
Pinagpugaran ng “marunong.”
Sa lamayan may nakangisi,
Sa ginawang pagtataksil,
Tila hindi nila napansin,
Ang mga tao ay gising.
–Agosto 6, 2025
