Kodao is a leading alternative radio content producer in the Philippines. Listen to our radio programs, podcasts and interviews here.

ITANONG MO KAY PROF: Podcast on China and US aggression in the Philippines

/in , , /by

Itanong mo kay Prof
June 9, 2015

Panayam ng Kodao Productions kay Prof. Jose Maria Sison, Chairperson, International League of People’s Struggle (ILPS) hinggil sa usapin ng panghihimasok ng mga bansang China at Amerika sa kalupaan ng Pilipinas. Si Prof. Sarah Raymundo ng Congress of Teachers and Educators for Nationalism and Democracy (CONTEND) ang pangunahing tagapagpadaloy at tagapagtanong.

Mga Tanong:

1. Ano po ang pahayag ng International League of People’s Struggle o ILPS hinggil sa mainit na usapin ng panghihimasok ng bansang Tsina at Amerika sa mga teritoryong saklaw ng pag-aari ng Pilipinas?

JMS: Maalab na makabayang pagbati sa iyo, Professor Raymundo.

Binabatikos at linalabanan ng International League of Peoples’ Struggle o ILPS ang panghihimasok ng Tsina sa West Philippine Sea, ang mga reklamasyon na ginagawa ng Tsina sa Kalayaan group of islands na malapit sa Palawan at ang pag-okupa ng Tsina sa Panatag Shoal o Bajo de Masinloc na malapit sa Zambales.

Binabatikos at linalabanan din ng ILPS ang rotational deployment ng US forces sa ilalim ng Visiting Forces Agreement at pagtatayo ng mga US military base sa ilalim ng Enhanced Defense Cooperation Agreement.

2. Matagal ng tumututol ang mamamayang Pilipino sa patuloy na panghihimasok ng US sa maraming usapin sa ating bansa. Subalit binibigyang depensa ng pamahalaan na ang mga kasunduang sinang-ayunan ng Pilipinas at US kagaya ng Visiting Forces Agreement (VFA) at Enhanced Defense Cooperation Agreement (EDCA) ay pagtiyak na walang agresyong magaganap mula sa labas ng bansa. Ano po ang inyong pagtingin sa bagay na ito? Talaga po bang maaasahan natin ang US ngayong ang Tsina ay patuloy na inaari ang ilang teritoryong pandagat ng Pilipinas?

JMS: Hindi maasahan ang US na ipagtanggol ang Pilipinas sa agresyon ng Tsina. Mas malaki ang interes ng US sa pakikipag-ugnayan sa Tsina kaysa sa Pilipinas. Mulat sapul alam ng US ang mga reclamation na ginagawa ng Tsina sa Kalayaan pero hindi tumutol ang US.

Ang mismong US ay matagal nang imperyalistang mapanghimasok sa Pilipinas. Matagal nang nauna sa Tsina sa agresyon sa Pilipinas. Kunwari tagapagtanggol ang US sa Pilipinas. Bantay salakay ang US. Gusto lang niya na ipataw ang mga interes sa Pilipinas. Lumilitaw na ang US at Tsina ay magkasabwat sa paghati at pagdomina sa Pilipinas.

3. Sa inyo pong pananaw, maipagwawagi ba ng mga progresibong grupo at mga tagapagtaguyod ng integridad at soberanya ng Pilipinas ang laban nito sa agresyong Tsina? Maaari ba kayong magbigay ng halimbawa ng isang maliit na bansa na lumaban at nagtagumpay sa panghihimasok ng malalaking bansa.

JMS: Malakas at makatarungan ang posisyon ng Pilipinas sa balangkas ng UN Convention on the Law of the Sea. Maliwanag na sa Pilipinas ang 12 nautical miles na territorial sea, 200 nautical miles na exclusive economic zone at 150 pang nautical miles na extended continental shelf. Dapat manalo ang inihapag ng Pilipinas na kaso laban sa Tsina sa International Tribunal on the Law of the Sea. Pero sinabi na ng Tsina na hindi susunod sa desisyon ng tribunal kung pabor sa Pilipinas.

Wala mang sapat na barko, eroplano at missile ang Pilipinas para labanan ang panghihimasok ng Tsina, puedeng magkaisa ang sambayanang Pilipino at puedeng inasyonalisa at wakasan ang mga empresa ng estado at mga korporasyon ng Tsina sa loob ng Pilipinas. Marami ring bansa ang susuporta sa makatarungang layunin ng sambayanang Pilipino.

4. Ano po ang inyong mensahe sa sambayanang Pilipino hinggil sa ating topic ngayon sa ating podcast?

JMS: Pinakaimportante ang pagkakaisa ng sambayanang Pilipino para ipagtanggol ang pambansang soberanya at integridad sa teritoryo. Mainam na itinayo ang kilusan ng mga Pilipinong nagkakaisa para sa pambansang soberanya.

Kapag malakas at matibay ang pagkakaisa, mapangyayari natin ang nasyonalisasyon ng mga empresa ng mga dayuhang kaaway at ang pagpapatupad ng pampulitika at ekonomikong soberanya at ang pag-unlad ng ekonomya sa pamamagitan ng pambansang industryalisasyon at reporma sa lupa.

5. Ano po ang inyong mensahe sa darating na June 12, Araw ng Kalayaan?

JMS: Nasa kamay ng sambayanang Pilipino ang pagtataguyod ng pambansang independensiya, integridad sa teritoryo, demokrasya ng bayan, tunay na pag-unlad, hustisya sosyal, kapayapaan at pakikipagkaibigan sa lahat ng bayan.

Dapat may kapasyahan at katatagan tayong lumaban sa mga imperyalista, mga asendero at mga bulok na opisyal na nakikipagsabwatan sa mga imperyalista para yurakan ang mga pambansa at demokratikong karapatan ng mga mamamayan. Maraming salamat.

ITANONG MO KAY PROF: Podcast on Peace Talks – GPH and NDFP & GPH and MILF

/in , , /by

Panayam ni Ms. Sonia Capio ng Kodao Productions kay Prof. Jose Maria Sison, NDFP Chief Political Consultant hinggil sa kalagayan ng usapang pangkapayapaan sa pagitan ng GPH at NDFP at GPH at MILF.

April 9, 2015

Mga Tanong para sa peace talks sa pagitan ng GPH at NDFP at GPH at MILF

1. Ano po ang update sa usapang pangkapayapaan sa pagitan ng GPH at NDFP? Matutuloy pa rin po ba ito bago pa matapos ang termino ni Pangulong Noynoy Aquino?

JMS: Patuloy na handang makipag-usap ang NDFP. Pero ang GPH ang hindi handa. Kung gayon, nagiging malabo na ang resumption ng formal talks ng GPH  at NDFP.  Sabi ng Malakanyang na nakabuhos ang atensyon nila sa pagtutulak ng BBL at paghahabol ng peace with  MILF.

Hanggang ngayon walang maliwanag na negotiating panel at chairman ng GPH para makipag-usap sa NDFP.  Lumilitaw na sa buong panahon  ng rehimeng Aquino wala talagang interes sa peace talks kundi paggamit ng dahas laban sa kilusang rebolusyonaryo.

2. Ano po ang inyong masasabi sa usapang pangkapayapaan sa pagitan naman ng GPH at MILF? Tila nagkahati-hati po ang mga pananaw ng mga nasa pamahalaan at matindi ang mga banggaan sa usapin ng Bangsamoro Basic Law (BBL) at ang kawastuhan kung dapat pa bang ituloy ang pakikipag-usap nila sa MILF o hindi na.

JMS: Sa loob at labas ng GPH, lumakas ang sumasalungat sa BBL dahil sa Mamasapano at constitutional issues. Tiyak na maraming susog ang gagawin sa Kongreso, laluna sa Senado, hanggang sa posibleng ayaw na ng MILF ang lalabas na final draft ng BBL.

Kahit tanggapin ng MILF ang anumang BBL na aprubahan ng Kongreso, may mga magdadala pa rin ng constitutional issues sa Korte Suprema. Baka mauuntol ang BBL hanggang maubos na ang termino o buhok ni Penoy Bugok.

3. Ano po ang inyong pagtingin sa Bangsamoro Basic Law o BBL?

JMS: May constitutional issues na nakasalang sa  Kongreso ng GPH. Hanggang ngayon, walang pinal na anyo ng BBL dahil susugan nang susugan pa yan sa Kongreso. Habang wala pang pinal na anyo ng BBL, mahirap mangahas ng opinion ng pagkatig o pagtuligsa sa kabuuan ng BBL.

ITANONG MO KAY PROF: Podcast on the Congress hearing on the Mamasapano incident

/in , , /by

Panayam ng Kodao Productions kay Prof. Jose Maria Sison hinggil sa naganap na Congress hearing tungkol sa Mamasapano incident.

ITANONG MO KAY PROF
April 9, 2015

1. Sa kabuuan, ano po ang inyong masasabi sa katatapos pa lang na hearing sa Kongreso hinggil sa Mamasapano incident?

JMS: Lalong lumiliwanag na si Aquino ang nag-utos na isagawa ang Oplan Exodus at siya rin ang nag-authorize sa suspendidong Heneral na Purisima bilang kasama niya sa pagmando kay Napeñas at inako nilang dalawa ang koordinasyon sa loob  ng PNP at sa AFP.

Nagtaksil si Aquino sa mga pinaslang na 44 na police commando dahil hindi siya kumilos para iligtas ang mga ito magmula nang 7 a.m. hanggang 12 noon kung kailan naipit at napalaban ang SAF 44 hanggang naubos.

Tama ang sabi ni Napeñas na si Aquino at Purisima ang dahilan ng kawalan ng saklolo at pagkamatay ng SAF 44. Tama rin ang pagtutuon ni Congressman Neri Colmenares sa katotohanan na hindi kumilos ang commander-in-chief para iligtas ang mga pinaslang.

2. Nabasa nyo po ba ang 20 tanong na inihanda ng Makabayan bloc para sa Congress hearing? Bakit po kaya hindi ito sinang-ayunan ng nakararaming kongresista na ipadala man lamang sa palasyo para mabasa ng pangulo at bahala na siya kung sasagutin niya ang mga ito o hindi?

JMS: Binasa ko nang masinop ang 20 tanong. Tama ang panimulang tanong kung bakit inauthorize ni Aquino si Purisima na magcommand kay Napeñas. Tama ang tanong kung bakit si Aquino ay walang ginawa para pakilusin ang Army at iligtas ang mga kawawang police commando. Tama ang tanong kung bakit hindi nag-utos si Aquino ng fly over sa maisan.Tama ang tanong tungkol sa pag-utos ng US kay Aquino.

Ang mga kongresista na nagharang sa 20 tanong ay naglantad sa sarili bilang mga utusan at kasabwat ni Aquino sa katiwalian. Alam naman ng sambayanan na mga 90 por syento ng Lower House ay mga garapal na magnanakaw sa pork barrel.

3. Ano po kaya ang nagtutulak kay Pnoy na umiwas sa mga pagtatanong hinggil sa kanyang responsibilidad sa Oplan Exodus? Magkakaroon po ba kaya ng magandang bunga ang Congress hearing kahit wala ang pangulo?

JMS: Ayaw ni Aquino na sagutin ang 20 tanong dahil lalong malalantad ang kriminal na pananagutan niya sa pagpaslang sa mga mga police commando ng SAF gayundin sa kanyang pagsisinungaling sa bayan. Ayaw din ni Aquino na lalong malantad ang pag-utos ng US sa kanya.

Mahirap sabihin na makakagawa ng final report ang Lower House para ilantad ang buong katotohanan at pananagutin si Aquino dahil mayorya sa Lower House ang mga  kasabwat ni  Aquino sa pangungurakot, mas malamang na white wash or yellow wash ang mangyayari.

4. Sa panahon ng mga pagtatanong hinggil sa kondukta ng dapat ay tulungan na nangyari sa pagitan ng PNP-SAF at AFP, para mailigtas ang SAF 44, meron pong ilang magkakaibang paliwanag ang dalawang pwersa ng pamahalaan na maaaring mauwi sa matinding di pagkakaunawaan kung ito ay isasawalang bahala lamang. Ano po ang inyong pagtingin sa bagay na ito?

JMS:  Maliwanag naman na si Aquino ang may kasalanan dahil sa stand down order niya. May utos siyang huwag saklolohan ang SAF 44 para iwasan daw ang labanan ng Army at MILF. Isa pa, nabuwisit si Aquino sa SAF dahil nakatakas si Usman. Naging dahilan na ito para maging mababaw ang pansin ni Aquino sa mga update at hindi na niya sapol ang kalagayan na mauubos na yong SAF 44.

5. Ano po ang inyong masasabi sa partisipasyon ng Magdalo Party List sa Congress hearing ng Mamasapano?

JMS:  Malamang na susundin nila ang pagsipsip kay Aquino, tulad ng ginagawa ni Trillanes sa Senado at sa press releases niya.  Itatambak nila kay Napeñas at SAF ang sisi sa pagkapaslang ng mga kapwa nilang SAF.

6. Ano po ang inyong pagtingin sa kahihinatnan nina Purisima at Napeñas sa imbestigasyon ng nabigong Oplan Exodus?

JMS: Baka sa katapusan, sina Purisima at Napeñas at SAF lang ang babatikusan ng final report ng Lower House.  Posible ring si Napeñas lamang ang tatambakan ng sisi dahil sa kung pananagutin nila si Purisima magiging tampok din ang katotohanan na si Aquino ang may pinakamabigat na kasalanan.

Si Aquino ang  nag-authorize sa isang suspendidong heneral na maging taga-utos kay Napeñas.  Hindi niya inisip na wala sa katayuan si Purisima na makipagcoordinate sa loob at labas ng PNP.  At kriminal na nagpabaya naman si Aquino kahit siya na ang umako sa koordinasyon bilang commander-in-chief.

ITANONG MO KAY PROF: Podcast on Transition Council

/in , , /by

Panayam ng Kodao Productions kay Prof. Jose Maria Sison hinggil sa transition council.
MARCH 4, 2015

1. Ano po ang ibig sabihin ng transition council? Kailan po ito itinatayo o binubuo?

JMS: Sa aking pag-unawa, ibig sabihin ng transition council ay temporayo at tulay lamang sa isang permanente o regular na kaayusan. Puedeng palitan agad si Aquino ng konseho at bigyan daan ang elekyson para palitan siya. Puedeng itayo o buuin ang konseho bago pa mapatalsik si Aquino.

2. Sino-sino ang bumubuo sa transition council at anong kapangyarihan meron ito?

JMS: Pwedeng buuin ang transition council ng mga personahe na dating nannungkulan nang marangal sa gobyerno at mga kinatawan ng mga mayor na pwersang magpapatalsik kay Aquino. Pwedeng patakbuhin ng council ang gobyerno hanggang ihalal ang kapalit ni Aquino.

3. Ano po ang inyong pananaw sa mga nag-iisip na si Binay kasi ang papalit (na isa ring corrupt) kaya pagtiyagaan na lamang si Pnoy at hintayin ang election?

JMS: Pwedeng council ang magpatakbo sa gobyerno sa halip na si Binay, kung kaya ng masang patalsikin si Aquino at may suporta ng pulis at militar. Masama na panatilihin ang isang masamang lider sa takot na masama ang papalit. Mabuti naman ang konseho bilang kapalit. Pagsikapan na mangibabaw ang konseho sa halip na tanggapin na lamang na manatili ang masamang lider.

4. Sa inyong pagtingin, aalis po ba sa pwesto si Pnoy?

JMS: Kapit tuko yan sa kapangyarihan tulad ng mga kasabwat niyang masisiba. Magtagumpay man o hindi ang kilusang pagpapatalsik, makakalikha ng lakas ng masa para tiyakin na malitis at maparasuhan si Aquino at mga kasabwat niya kapag tapos na ang termino nila. Kung maghalukipkip na lamang tayo, hindi magkakaroon ng hustisya sa kahulihan.

5. Ano po ang inyong pagtingin sa ginawang pagdinig ng Kongreso at Senado sa Mamasapano incident? Marami po ang hindi nasiyahan sa resulta dahil sa pag-iwas na kundinahin ang Amerika at si Noynoy Aquino.

JMS: Lumilitaw na hindi ganap at puspusan ang imbestigasyon. Hindi tinuunan ang pananagutan ng US at ni Aquino. Galit ang maraming pulis at militar kay Aquino dahil ipinahamak niya ang sariling tauhan at umayaw siya sa pagsaklolo sa kanila sa loob ng maraming oras.

Dagdag na tanong:

1. Meron po ba kayong mensahe sa pandaigdigang araw ng kababaihan?

JMS: Taus puso akong bumabati sa kababaihang Pilipina sa araw ng kababaihan. Dapat ipaglaban nila ang pagkakapantay sa kalalakihan sa lahat ng gawain at pagpupunyagi sa lipunan. Ibayong uunlad ang lipunan kung ang kalahati nito, ang kababaihan, ay lubusang may laya at pagkakataon na iambag ang kaya nila sa pulitika, ekonomya, kultura at ibang larangan ng sosyal na pagsisikap.

ITANONG MO KAY PROF: Podcast on the US war on terror (Part 4)

/in , , /by

Panayam ng Kodao Productions kay Prof. Jose Maria Sison hinggil sa war on terror ng US.

February 17, 2015

5. Bakit po kaya sinasabing makapangyarihan ang US sa lahat ng mga bansa sa daigdig? Hindi po ba talaga maaaring tumutol ang isang bansa kung ayaw nila sa mga polisyang pang-ekonomiya na inilalako ng US sa kanila?

JMS: Makapangpayarihan ang US hindi lamang dahil sa monopolyo kapital nito kundi dahil sa malaking lakas militar nito, laluna ang kanyang hightech military equipment.

6. Madalas pong sangkot ang US sa mga gerang agresyon partikular sa ilang mga bansa sa Middle East, hindi po ba nauubos talaga ang kanyang mga gamit pandigma? Hindi po ba nagagalit ang mamamayang US sa ginagawa ng kanilang pamahalaan?

JMS: Ginagawang negosyo ng US ang paggawa ng mga military equipment at ginagamit nito ang mga kagamitan na ito para sa mga gerang agresyon para mangibabaw sa mga bansang may malaking likas yaman, laluna sa gas at langis. Pero magastos ang gera, masyadong magastos at itinataya ang kabang yaman ng bayan at buhay ng mga sundado. Sa agresyon ng US sa Irak at Afghanistan, naglustay ang US ng higit na 4 na trilyong dolyar at libu-libong buhay ng mga Amerikano. Kung gayon, nagagalit ang masang Amerikano sa paglustay sa malaking pera ng bayan at buhay ng mga Amerikano.

7. Maaari po ba kayong maghalimbawa ng bansang lumaban na sa US at nagwagi.

JMS: Lumaban sa US at nagwagi ang mga mamamayan ng Korea, Cuba, Byetnam, Kambodya at Laos.

(Photo from http://commons.wikimedia.org/)

ITANONG MO KAY PROF: Podcast on the US war on terror (PART 3)

/in , , /by

Panayam ng Kodao Productions kay Prof. Jose Maria Sison hinggil sa war on terror ng US.

February 17, 2015

3. Ano po ba ang relasyon ng Pilipinas sa US at bakit sinasabing sunudsunuran si Aquino sa US?

JMS: Ang Pilipinas ay malakolonya ng US. At ang gobyerno sa isang malakolonya ay papet lamang sa US. Kung gayon, tinatawag na papet at sunudsunuran ang presidente na si Aquino.

4. Ano po ang ganansya ng US sa kanyang pakikialam sa ekonomiya at pulitika ng mga bansa sa Middle East at Asya?

JMS: Malaki ang ganansya ng US sa pakikialam nito sa ekonomya at pulitika ng Middle East. Kinokontrol, dinadambong at pinagkakatubuan ng US ang mga likas na yaman (laluna ang gas at langis), ang palengke at larangan ng pamumuhunan.

(Photo from Philstar.com)

ITANONG MO KAY PROF: Podcast on the US war on terror (Part 2)

/in , , /by

Panayam ng Kodao Productions kay Prof. Jose Maria Sison hinggil sa war on terror ng US.

February 17, 2015

2. Bakit po ipinapaloob ang “Mamasapano incident” sa war on terror po ng US?

JMS: Ang Mamasapano incident tungkol daw kay Marwan, isang tao mula Malaysia at kanyang kabig na Moro. Sinasabi ng US na nakapaloob si Marwan o kaya ang Mamasapano incident sa war on terror para lamang ipaggumiit ng US na may lisensyang makialam sa Pilipinas at mag-utos kay Aquino, Purisima at SAF.

ITANONG MO KAY PROF: Podcast on the US war on terror (Part 1)

/in , , /by

Panayam ng Kodao Productions kay Prof. Jose Maria Sison hinggil sa war on terror ng US.

February 17, 2015

1. Ano po ba ang ibig sabihin ng US war on terror?

JMS: Sa tinawag ng US na war on terror, sinasabi ng US na ito ay perpetual at borderless, walang hangganan sa panahon at teritoryo at walang depinidong estado na kalaban ng US. Basta ipinapalagay ng US na kalaban niya sa gera ang alinmang maliit na pulutong na sinasabing terorista sa anumang bahagi ng daigdig at ginagawang lisensiya ito para manghimasok ang US sa anumang bansa.

Ito ay pakunwaring gera at kathang isip lamang ng US na inumpisahan ni Bush magmula 9-11. Hindi gera ito na nakabatay sa depinisyon ng gera sa ilalim ng international law. Sa tunay na gera ng mga estado may deklarasyon ng gera mula sa isa o magkabilang panig o kaya sa isang gera sibil ng nakatayong estado at kilusang rebolusyonaryo may deklarasyon ng gera mula sa isa o magkabilang panig. Kung ang isang maliit na grupo ay gumawa ng krimen, tinutugis ito bilang isang police matter at hindi bilang isang matter of war sa pagitan ng mga hukbo.

ITANONG MO KAY PROF: Podcast on the senate hearing on the Mamasapano encounter (Part 3)

/in , , /by

Panayam ng Kodao Productions kay Prof. Jose Maria Sison hinggil sa naganap na senate hearing tungkol sa Mamasapano encounter.

February 10, 2015

3. Mararamdaman ang galit at biased na kaagad na pagtingin ni Senator Alan Peter Cayetano laban sa MILF at BIFF at gusto pa niyang pag-awayin ang dalawang grupo para patunayan ang sinseridad sa usapang pangkapayapaan ng MILF sa pamahalaan. Sinabi rin niyang kinakanlong ng mga grupong ito si Marwan. Ano po ang inyong masasabi dito?

JMS: Malamang na sumasakay si Cayetano sa Christian chauvinism o sa mga ready-made bias laban sa mga Muslim. Pero kailangang magpaliwanag ang MILF at BIFF kung si Marwan ay kinukupkop nila. Sa personal na tingin ko, mahirap na sabihin na naroon si Marwan sa Mamasapano dahil walang corpus delicti o bangkay ni Marwan ngayon. At malamang na nagsisinungaling ang FBI tungkol sa DNA analysis para lamang tulungan nito ang propaganda ni Aquino.

Tanggap naman ng FBI na wala silang sample ng DNA ni Marwan mismo kundi ng mga supposed relatives niya. Sabi ng MNLF na nasa Lanao si Marwan at wala siya sa baryo ng Mamasapano na sinalakay ng SAF. Siyanga pala, bale sina Aquino, Purisima at SAF ang sumalakay sa baryo ng Mamasapano. Sabi pa ni Napeñas na SAF ang nagmasaker ng 250 katao sa Mamasapano. Paanong may kasalanan ang MILF. Hindi pwede.

ITANONG MO KAY PROF: Podcast on the senate hearing on the Mamasapano encounter (Part 2)

/in , , /by

Panayam ng Kodao Productions kay Prof. Jose Maria Sison hinggil sa naganap na senate hearing tungkol sa Mamasapano encounter.

February 10, 2015

2. Parang maaabswelto pa yata si Purisima bilang operator ng
Oplan Exodus at madidiin ng husto si Napeñas. May komento po ba kayo sa bagay na ito?

JMS: Si General Napeñas talaga ang piniling maging fall guy para pagtakpan ang responsabilidad nina Purisima at Aquino. Pero nasabi na niya dati na si Purisima ang nasa command at calling the shots mula sa kanyang White House sa Camp Crame. Sabi rin niya sa Senado na si Purisima ang nagdala sa kanya kay Aquino sa Pangarap (house niya). Kalokohan talaga na pinalilitaw ng mga alipures ni Aquino sa Senado at media na walang pananagutan sina Aquino at Purisima.

(Photo/Gen.Purisima?Interaksyon.com)