By George Tumaob Calaor
ikaw ngayon
ay batis
na hindi
mawawalan
ng tubig…
pumapahid sa panunuyot
ng mga nauuhaw…
dumidilig sa kahungkagan ng kamalayan–pinupunan
ng karunungan
nang sa kasinungalingan
diwa ay hindi mailihis sa tama at makatarungang kamulatan.
Ikaw din ay ilog
ng ragasang
hindi masasagkaan…
daluyong ng pakikibakang
himagsik ay
hindi mapipigilan
walang pader ng karahasan ng berdugo ang makahaharang
pagkat ang iyong agos
ay mithing kalayaan
at katimawaan
ay tagumpay
na tanging
sa iyo lamang
ay nakalaan!
Kaaway ngayon
sa iyong paglisan
ay naglalasing
sa kasiyahan…
ang hindi nila batid
ang nawala lamang
ay ang iyong katawan
at ang pagpapalaya
ay walang kamatayan!
Ikaw ay hanging
pumapawagayway
sa watawat
ng nagbuklod
na lakas
at kagitingan
ng mga manggagawa
at mga magsasaka!
Ikaw at iba pang
mga kasamang martir
ay liyab ng sulo
sa noo ng bawat
rebolusyunaryong
walang humpay
ang pagsulong
at rebolusyon
ay tiyak nang
mananambana
sa kalubsan ng tagumpay…
uri ay mawawala…
pagkapantay ay
mamamandila!
