Ni Pia Montalban
Walang gera sa Bitnong.
Payapa sa amin
sa Sitio Keon, Bitnong
Dupax Del Norte.
Payapa ang mga burol
at talampas,
ang mga talon, sapa,
at ilog.
Laging buntis
ang lupa.
Hitik ang supling
na rambutan.
May mga guyabano din,
lanzones,
at iba pang pagkain
na pinagkakakitaan din.
Ngunit umakyat
ang mga nakaasul at kamoplahe,
may bullet-proof vest,
may mahahabang armas,
may helmet,
may bakal panangga,
at may “order”
na mang-aresto.
Walang gera sa Bitnong.
Payapang mga magsasaka’t
katutubo ang mga tao
sa Sitio Keon.
Oo, laging bagong hasa
ang aming kampilan.
At ang aming mga itak
laging nakatali sa balakang.
Ngunit ito ay mga gamit
pang-bukid
at hindi armas pandigma
ng dayuhang bansa.
Payapa ang hangarin
ng mga magsasaka’t katutubo.
Bungkalin ang lupa.
Maghatid ng pagkain sa ating lamesa.
Ngunit, marahas pa sa gera
ang utos ng korte:
ipamina ang lupang ipinamana,
oo, ipamina ang lupang ipinamana.
Palayasin ang mga magsasaka.
Itaboy ang mga katutubo.
Wasakin ang kalikasan.
Wasakin ang kabuhayan.
Walang gera sa Bitnong.
Pero buwal ang mga puno
sa chainsaw na walang permiso.
Arestado ang pitong tao.
Habang protektado
ng halos tatlong daang pulis,
ang pagpasok ng makina
ng dayuhang korporasyon.
