Ni Ibarra Banaag
Di pa tinatanong, depensa agad
Nag-trio pa itong mga “kagalang-galang”
Kumanta agad wala pang musika
Naglubid nang naglubid ng litanya
Kesyo wala siya/silang kakilala
Di daw kakampihan ang pamilya
Personal daw ang binigay na pera
Nalimutan na nila ang delikadeza
Ni isa ay di sangkot sa anomalya
Walang kamalay-malay sa dilihensya
Mga ghost project noon at ngayon
Absent ba kayo sa naging desisyon
Puro tanggi, puro satsat at turuan
Kanya-kanyang takas sa damuhan
Imbistigasyon sa ibaba at itaas
May kinalaman din ang naggigisa
Bago umiyak sa umano’y fake news
Bago magalit sa mga pinupukol
Di ba sa bibig nahuhuli ang isda
At sa matabil na dila ng oportunista!
Sa dulo ng akting, komedya’t drama
Mauuwing nakanganga ang biktima
Tatakbo ulit ang mga kawatan
Iboboto naman muli ng naisahan
Kung siklong ito ay di matitigil
Mapapatid lang ang litid sa gigil
Ang mga matapang na naglantad
Mauuwi lang sa wala ang ginawa
Magbantay at ‘wag manghinawa
Huwag mapagod at magsawa
Kailangang magapi ang kabalbalan
Kailangan putulin ang kasakiman
–Setyembre 4, 2025
