Bandillo 21
Hindi pa sumisilip
ni madama ang liwanag at init ng bukang-liwayway
ay kasama mo ang mga pamalakaya
na naglakbay; pumalaot kayo sa gitna ng mabangis,
madilim at ‘di payapang karagatan
ng karalitaan; maingat mong inihanda
ang nilulumot na lambat kasama ang gasera
na siyang inyong tanglaw
sa kagilagilalas na pakikipagsapalaran
sa ilalim ng mga bituin,
ng buwan ng bulong ng hangin,
ng mga nakakatakot na pangitain,
ng pakikipag duwelo
sa mga nagsisisayaw na
anino ng mga mangangaso ng tao
sa ilalim ng hubad na kalawakan;
habang ang iyong puso’y
puno parin ng pangarap
na balang araw babalikan mo
ang lupang iyong pinanggalingan
at hahalik ang labi
ng iyong bangka
sa dalampasigan ni Laya
kasama ang minahal mong
pamalakaya.
Pebrero 4, 2019
Para kay Felix Randy Malayao 1970-2019
Isinulat ni: Rene Boy Abiva