Posts

Mga pamilyang apektado ng demolisyon, wala pa ring nakukuhang aksyon

Sa kabila ng banta sa kalusugan ng mga mamamayan, nananatili pa rin sa labas at walang masilungan ang 107 mga pamilya sa Sampaloc, Manila.

“Sabi ng (gubyerno) pumasok sa bahay, saan kaming papasok na bahay? Dati may kubo kami, sinira lang nila, tas ngayon tinatanong namin, saan namin patutulugin ang mga bata?”, ani ni Benjie Subillano, isa sa mga nawalan ng tirahan dahil sa demolisyon.

Dinimolish ng pamahalaan, nitong nagdaang buwan, ang mga bahay sa gilid ng kalsada sa Barangay 432, Sampaloc, Manila. Ito ay sakop ng clearing operation na isinagawa sa lugar. Kahit nasa 217 na ang bilang ng mga nagpostibo sa COVID-19 sa bansa, wala pa ring nakukuhang aksyon ang mga biktima ng demolisyon.

Bidyo ni Arrem Alcaraz/Kodao

107 pamilya sa Sampaloc, Manila, walang matuluyang bahay

Ni Sanafe Marcelo

Sinasabi ng gobyerno na manatili lamang sa bahay ang taumbayan dahil sa banta ng COVID-19 sa bansa. Ngunit ang tanong ng 107 pamilya sa Barangay 432 Zone 44 District 4 Sampaloc, Manila, paano sila papasok ng bahay kung wala naman silang bahay?

Kuha ni Sanafe Marcelo

Ayon kay Benjie Subillano, isang street vendor, binuwag o dinemolis ang bahay noong Pebrero 19 kaya nagtitiis na lamang sila na sa kalsada natutulog.

Kuha Ni Sanafe Marcelo

Dagdag ni Subillano na hindi sila natatakot sa COVID-19 dahil ang mas ikinatatakot nila ay ang kawalan ng pagkain. Wala na nga raw silang bahay ay wala pa silang hanapbuhay dahil sa lockdown. Nangangamba siya na higit na maaapektuhan ang kanilang mga anak at tiyak ang kagutuman ang haharapin ng kanyang pamilya.

Panawagan ni Subillano sa pamahalaan na sana ay matulungan sila na bigyan ng maayos na relokasyon. Aniya , “Hindi naman kami hayop, tao din kami na nahihirapan din.” #