Posts

Lihim ng kalihim

Ni Ibarra Banaag

Datapuwa’t sino man ang umaako,

sino man ang sumalo o sumagot,

sa mga tanong at usisa sa kalihim,

mabubunyag pa rin ang nililihim.

Kahit pa bastos at haragan ang litanya,

panduduro at paglulubid ng patutsada,

malalantad lamang ang kahungkagan,

at umaalingasaw ng mga sabwatan.

Hindi lamang pala sa mga nakapaskil,

sa silid aralan ang nais baklasin,

kundi ang kasaysayan ng diktadurya,

nilalabusaw ng walang patumangga.

Dahil kaya sa 125 na milyong pondo,

na sinasabing bawal ng Konstitusyon,

pagsapaw sa tungkulin ng Kongreso,

pero pinipilit ng ilan na ma-abswelto.

Bawal subalit nagbubulag-bulagan,

mali ngunit binibigyan ng katwiran,

nakapangyayari kahit pa iligal,

ipinagtatanggol ng walang kagutal-gutal.

Bukod tanging ahensya ng gobyerno,

na busog at bundat na bundat sa pondo,

ang bansag at tawag sa iskwela,

“sipsip” kasi kaya may medalya.

Aba aba bulaga yaong mga ulaga,

ilang araw parang naglahong bula,

kung lumustay ay walang humpay,

masaya’t mayabang ang garapal!

Ngunit ang higit na nakakabahala,

sa mga mambabatas ay okey lang,

at papatayan ka pa ng mikropono,

mga tonto’t balasubas sa Kongreso.

Walang kahihiyan silang nagsisilbi,

hayok at umasaang makakahati,

sa kulimbat at pork ng kalihim,

sumisingasing at nagngangalit,

sa tuwing nabubunyag kanyang lihim.

–Setyembre 12, 2023

Pahayag ng Makabayan Bloc sa badyet ng Office of the President

Nag-rali ang mga kasapi ng Makabayan Bloc sa Batasan noong Lunes, Setyembre 14, upang tutulan ang anila’y napakalaking badyet ng tanggapan ni Pangulong Rodrigo Duterte samantalang mababa ang badyet para sa kalusugan sa gitna ng krisis ng coronavirus.

Ang pagkilos ay kasabay ng deliberasyon ng House of Representatives Committee on Appropriations sa lampas walong bilyong piso para sa Office of the President sa susunod na taon, higit kalahati nito ay intelligence fund na maaring hindi na iulat sa Commission on Audit. Buong-buong inaprubahan kalaunan ang badyet ng pangulo.

Health Workers storm Malacañang over budget cuts and lack of salary increases

Nag-protesta ang mga manggagawang pangkalusugan, nurse at doktor sa Mendiola sa Maynila para tutulan ang malaking budget cut at manawagan ng dagdag sahod noong Oktubre 15. Binatikos nila ang P10 bilyon na budget cut sa sektor para sa 2020.

Ayon sa Alliance of Health Workers, tuluyan nang tinalikuran ng gobyerno ang obligasyon nito na bigyan ng maayos at abot-kayang serbisyong medikal ang taumbayan. Taun-taon ay binabawasan ang budget sa mga serbisyo habang pinalalaki ang budget sa pambansang depensa at pork barrel ng mga kongresista.

Nanawagan din sila na taasan ang sahod ng mga manggagawang pangkalusugan sa P16,000 sa minimum kada buwan, P30,000 para sa mga nurse at P80,000 para sa mga doktor. (Background music: News background / Bidyo ni Joseph Cuevas-Kodao)