Posts

ITANONG MO KAY PROF: Ang Imperyalismong US, Afghanistan at Taliban

Panayam ng Kodao Productions, sa pamamagitan ni Prof. Sarah Raymundo, kay Prof. Jose Maria Sison hinggil sa mas malalim pang pagtatalakay ng kaugnayan ng Estados Unidos sa Afghanistan at grupong Taliban.

ITANONG MO KAY PROF: Duterte, ICC, NTF-ELCAC, SONA at Eleksyong 2022

Panayam ng Kodao Productions, sa pamamagitan ni Prof. Sarah Raymundo, kay Prof. Jose Maria Sison hinggil sa mga isyu ukol kay Pangulong Duterte, International Criminal Court (ICC), National Task Force to End Local Communist Armed Conflict (NTF-ELCAC), State of the Nation Address (SONA), at Eleksyong 2022.

ITANONG MO KAY PROF

Duterte, ICC, NTF-ELCAC, SONA at Eleksyong 2022

July 12, 2021

Prof Sarah: Isang maganda at mapagpalayang araw sa lahat ng ating tagapakinig. Nagbabalik ang Itanong Mo Kay Prof!

Usap-usapan ang pagtakbo muli ni Duterte sa pusisyong Vice-President sa halalan 2022. Si Sara Duterte naman ang Presidente sa tambalang ito. Simula nang sumingaw ang ganitong usapan, napakaraming mamamayan ang nagugulat, nababahala, nagagalit, at marami-rami na rin ang mga kritiko mula sa oposisyon, kilusang progresibo, samahan ng mga abogado, periodista, educador, taong-simbahan at kabataan ang nagpahayag ng kritikal na suri rito.

Sabi nga ng mga kritiko, kapit-tuko si Duterte sa kapangyarihang ginamit lang naman niya para sa korapsyon, karahasan at sukdulang pagpapahamak sa ekonomiya at mamamayan sa gitna ng pandemya.

Makakasama natin muli si Professor Jose Maria Sison, Chairperson Emeritus ng ILPS at Chief Political Consultant ng NDF upang mapagusapan at masuri ang usaping ito at iba pang kaugnay na usapin katulad ng imbestigasyon ng International Criminal Court kay Duterte, ang Peace Talks at CASER, at ilan sa mga sikat na personahe na tatakbo bilang presidente sa 2022. Maalab na pagbati, Prof. Sison!

Prof Sison: Maalab na makabayan pagbati sa iyo Prof. Sarah Raymundo at sa lahat ng ating tagapakinig.

Mga Tanong

  1. Prof Sison, ano po ang masasabi ninyo sa pagtakbo raw ni Pangulong Duterte sa 2022 eleksyon bilang vice president? At may nauulinigan din na tatakbong presidente naman si Sara Duterte. Ano ang inyong opinion sa bagay na ito?

JMS: Garapal na kasakiman ng iisang pamilya na kandidatong presidente at bise president sina Sara Duterte at Rodrigo Duterte. Nais nilang magpanatili ng dinastiya. Dating pamantayan na sa isang partido ang nagtatambal na kandidato para sa tungkuling presidente at bise presidente ay galing sa magkaibang rehiyon. Ang dalawang sakim na Duterte ay galing sa iisang pamilya. Pambihira talaga. Naiilang pati ang mga alyado nila. Sabi nila political incest.

  • Hindi pa klaro kung sino sino nga ba ang tatakbong presidente sa 2022. Pero may nakapagsabi na tatakbo daw si Senator Manny Paquiao at Manila Mayor Isko Moreno. Ano ang inyong masasabi hinggil dito, Prof Sison? Sa tingin niyo ba may pag-asa ang mamamayan sa dalawang ito?

JMS: Malalakas ang dalawang posibleng kandidato na binanggit mo, sina Manila Mayor Isko Moreno at Senator Manny Pacquiao. Malayong matitinong lider ang dalawang ito kaysa sa mga Duterte.  Maasahan sila ng mga mamamayan. Mas malaki rin ang following nila kung ihambing sa following ng mga Duterte.  Imbento lamang ng mga bayarang poll survey firm at troll army ang umano’y mataas na popularity rating ng mga Duterte.

Dahil sa napakaraming krimen na gawa ni Duterte laban sa sambayanang Pilipino, kaunti  na lang ang sumusunod kay Digong Duterte. Itinuturing siyang traidor at bentador ng West Philipine Sea sa Tsina, berdugo at mamatay-tao, mandarambong at manggagantso. Pero kontrolado niya ang Comelec at bilangan ng boto sa halalan ng 2022.

  • Ang International Criminal Court (ICC) ay handa ng mag-imbestiga sa Pilipinas hinggil sa mga kinakaharap na kaso ng paglabag sa karapatang tao ni Duterte sa mamamayan. Inisnab ito ni Duterte. Sinasabing hindi naman na tayo kasapi ng ICC kaya walang dapat harapin sa kanila. Ano ang inyong paliwanag sa bagay na ito Prof Sison?

JMS: Maliwanag sa Tratado ng Roma na nagbuo ng International Criminal Court na saklaw pa rin nito ang mga krimeng gawa ni Duterte habang myembro pa ang Pilipinas sa tratado kahit na umalis pa ang Pilipinas sa tratado.  Isa pa, kahit na maging presidente ang anak niya at siya ay maging bise presidente at haharangin nila ang warrant of arrest, puedeng lagyan na ng ICC ng emcumbrance ang mga bank account at investments ni Duterte sa abroad para managot sa mga damage claims ng mga biktima.

Kung maging presidente at bise ang dalawang Duterte sa pamamagitan ng pandaraya tulad ng ginawa sa midterm elections noong 2019, tiyak na magkakagulo sa Pilipinas at  mapapatalsik sila mula sa kapangyarihan tulad ni Marcos noong 1986. Kung mapipigil nila ang posibilidad na ito, lulubha ang krisis sa ekonomiya at pulitika ng naghaharing sistema at lalagablab ang armadong rebolusyon ng sambayanang Pilipino hanggang maibagsak ang mga Duterte. Puede pang habulin si Duterte ng people’s court ng kilusang rebolusyonaryo kung mailagan nya ang ICC at justice system ng reaksyonaryong gobyerno.

  • Ang National Task Force – End Local Communist Armed Conflict (NTF ELCAC) ang nagpapatupad ng Executive Order 70. Grabe ang ginagawa nilang red tagging sa mga indibidwal at organisasyon. Kayo Prof Sison ay kasama rin sa nilalagyan ng sungay ng mga ito at ikinakalat inyong larawan hindi lamang sa Kamaynilaan kundi maging sa mga probinsya. Ano po ang inyong masasabi sa kanila?

JMS: Mga militarista at pasista, mga mamatay tao at mga magnanakaw ang nasa National Task Force-ELCAC.  Sila ang mga tunay na terorista.  Nagrered-tagging sila sa mga indibidwal at organisasyon na pumupuna at sumasalungat sa mga krimen ng rehimeng Duterte. Pagkatapos pinapatay at inaagawan ng ari-arian ang mga biktima ng red-tagging. 

Antemano bilyun-bilyung piso ang pondo ng task force. Pinagnanakawan ito ni Duterte at mga heneral niya sa ngalan ng surveillance, intelligence, psywar, arrest, combat operations at pakunwaring community development. Walang auditing. Yong red-tagging at murder operations ng task force ay para takutin ang masa, kontrolin ang takbo at resulta ng halalang 2022 at mangurakot ng pondo ng bayan.

  • Marami po ang nananawagan na buwagin ang NTF-ELCAC at ibaling na lamang ang bilyon bilyong pondo nito sa ayuda sa mamamayan. Sa kasalukuyan Prof Sison ay lugmok pa rin sa kahirapan ang marami nating kababayan. Marami ang walang trabaho, nawalan ng trabaho, nabawasan ang kita at nabaon sa utang. Ano ang inyong paliwanag sa bagay na ito, Prof Sison?

JMS: Dapat buwagin ang NTF-ELCAC at ibaling  ang bilyun-bilyong pondo nito sa ayuda sa mamamayan. Makatarungan na gamitin ang pondong ito para makaahon ang marami nating kababayan mula sa kahirapan na bunga ng krisis sa ekonomiya at pandemya.

Lantad ang katotohanan na marami ang walang trabaho, nawalan ng trabaho, nabawasan ang kita, nabaon sa utang at hindi makaagapay sa implasyon o pagtaas ng presyo ng mga batayang pangangailangan sa pagkain at iba pa. Sukdulang lumala at lumaganap ang kahirapan sa Pilipinas dahil sa patakarang neoliberal, korapsyon, militarisasyon at pagiging pabaya ni Duterte sa pandemya.

  • Malapit na ang State of the Nation Address o SONA ni Pangulong Duterte. Ito na po ang huling taon ng kanyang administrasyon. Sa limang taong nakalipas, may ilang natutuwa sa kanyang pamumuno pero mas marami ang nagagalit at humihingi ng hustisya sa maraming paglabag sa karapatang-tao, kawalan at kapos na ayuda sa panahon ng pandemya, kawalan ng subsidyo para sa mga magsasaka, kawalan ng hanapbuhay sa maraming kababayan at marami pang KAWALAN. Ano ang inyong masasabi sa nakalipas na limang taon ni Duterte, Prof Sison?

JMS: Sa pagiging presidente, maraming malalaking krimen na ginawa ni Duterte bilang traidor, tirano, mamamatay-tao, mandarambong at manggagantso.

a. Traidor siya at papet ng dalawang imperyalistang kapangyarihan. Hinahayaan niya ang US sa pagiging dominante pa rin sa ekonomiya, pulitika, militar at kultura sa Pilipinas dahil nagbibigay ng armas na panupil sa mga mamamayan. Bentador siya ng West Philippine Sea sa Tsina at kasabwat siya ng mga kriminal na Tsinong sindikato sa pagpuslit at pagkalat ng illegal na droga.

b. Nagkunwari si Duterte na laban siya sa illegal drugs at nag-utos sa pagpaslang ng higit sa 33,000 drug suspects. Pero ginawa niya itong paraan para maging supremo ng mga drug lord, kumita ng malaki, manakot sa publiko at gawing  kriminal, korap at pribadong utusan  ang mga pulis.

k. Nagkunwari rin siyang Kaliwa at sosyalista at nangakong palayain ang lahat ng bilanggong pulitikal, magkaroon ng seryosong peace negotiations at sumunod sa people’s agenda. Pero hindi nagtagal lumitaw ang pakana niyang sirain ang peace negotiations para magpataw ng terorismo ng estado sa sambayanang Pilipino at magpanatili ng sarili sa kapangyarihan. Pananagutan ni Duterte ang pagpaslang ng maraming tao sa ngalan ng “counter-insurgency” o kontra-rebolusyon.

d. Isa pang dahilan kung bakit  sinira ng Duterte ang peace negotiations. Marahas na tutol siya sa tunay ng reporma sa lupa at pambansang industrialisasyon. Nang malapit nang malubos ang borador ng Comprehensive Agreement on Social and Economic Reforms, nagpahiwatig na ayaw na niyang matuloy ang peace negotiations. Pusakal na burukrata kapitalista si Duterte at aso siya talaga ng mga imperyalista,malalaking komprador at asendero.

e. Nangako si Duterte na puksain  ang korupsyon sa gobyerno. Lumitaw na siya pala ang pinakagarapal na mandarambong sa pondo ng bayan. At pinalaya pa niya ang mga alyado niyang mandarambong tulad nina Gloria Macapagal Arroyo, mga Marcos, mga Estrada, Enrile, Revilla  at iba pa at pinawalang-saysay ang mga kaso laban sa kanila. Mga kasuklam-suklam na  mga burukrata kapitalista sila lahat.

g. Nangako ng subsidyo sa mga magsasaka. Hindi niya tinupad ito at hinahayaan niyang binabarat  ng mga komersyante ang lokal  produkto sa agricultura at pinaluwagan niya ang pag-angkat ng bigas at asukal. Sinira ni Duterte ang kasarinlan ng Pilipinas sa pagkain.

h. Nangako na itigil niya  ang endo. Hindi niya tinupad ito. Pinipigil pa niya ang pagtaas ng minimum wage samantalang walang tigil ang pagtaas ng presyo ng mga batayang kalakal dahil sa TRAIN law at malaking pagbagsak ng ekonomya sa nakaraang dalawang taon. Dahil sa implasyon at bangkarote ang gobyerno muhing-muhi ang mga mamamayan kay Duterte.

i. Hinayaan ni Duterte na kumalat ang Covid-19 sa Pilipinas sa palagay na kikita siya sa mga Chinese casino at 500,000 na Chinese tourist.  Pagkatapos nangako ng mass testing, libreng panggagamot at ayuda sa mga tao. Hindi tinupad ang pangako at ibinulsa niya ang bilyun-bilyon na inilaan para sa ayuda at pagbili ng bakuna at PPE para sa mga front liner.

l. Dati nang pinalulundag ni Duterte ang utang ng Pilipinas dahil sa korupsyon at military overspending. Sabi pa niyang hindi mapigil ang korupsyon at ipinagmamalaki pa na pinalalamon niya ng pera ang mga heneral. Palaki nang palaki ang depisit sa badyet ng gobyerno at sa foreign trade. Magmula 2016, pinalundag ni Duterte ang utang ng Pilipinas mula 5.9 trillion pesos hanggang 10.9 trillion pesos. Sa huling taon, pinalundag niya ng 2 trillion persos ang utang sa ngalan ng pandemya.

m. Pananagutan ni Duterte ang malubhang krisis ngayon ng naghaharing sistema sa ekonomiya at sa pulitika. Makapal pa ang mukha niyang tumindig  na magiging tunay na kapangyarihan sa likuran ni Sara bilang papet niya. Parang hindi niya alam na sa susunod na taon lalong lulubha pa ang krisis at lalong babalikwas ang masang Pilipino.

  • Meron po ba kayong gustong iwan sa ating mga tagapakinig, Prof Sison.

JMS: Dapat ilantad at kondenahin ang mga mga krimen ni Duterte. Dapat tayong magalit sa mga krimen na ito at sa tiyak na gagawin niyang  pandaraya sa darating na eleksyon para manatili sa kapangyarihan at mahadlangan ang warrant of arrest mula sa International Criminal Court.

Gawin ng sambayanang Pilipino at mga makabayan at demokratikong pwersa ang lahat na magagawa para labanan at gapiin ang lahat ng pakana at kilos ng pangkating Duterte para manlinlang at manakot sa masa at manatili sa kapangyarihan.

Pag-isipan na rin kung ano ang dapat nating gawin sa 2022 at sa anim na taon na susunod sa halalan, para sa pagsusulong ng pakikibaka para sa pambansang kalayaan at demokrasya. Mabuhay ang sambayanang Pilipino!

Prof Sison: Maraming salamat at paalam  sa inyo Sarah at sa lahat ng ating  tagapakinig.

Prof Sarah: Extro. Maraming-maraming salamat Prof. Sison para sa malaman at komprehensibong pagtalakay sa mga kasalanan sa mamamayan ni Duterte sa nakaraang limang taon. Nilinaw ni Prof Sison na walang silbi ang  pagtakbo ni Duterte, gayundin ng kanyang anak na si Sara Duterte, kundi ang matakasan ang mga kaso at krimen na patuloy na namemerwisyo sa mga mamamayan. Kaalinsabay ng pagnanais ng mga Duterte na paghariin ang impunity o ang kawalan ng pananagutan at kaparusahan para sa mga makapangyarihang gumagawa ng krimen laban sa mamamayan ay ang patuloy na pagkamal ng kita są pusisyon sa gubyerno.

Sinumang kumalaban sa kapangyarihan ni Duterte ay nararapat lamang na tahasang kondenahin at umagapay sa malawak na kilusan ng mamamayan na nagsasabing, Wakasan Na ang tiraniya sa bansa. Parusahan ang presidenteng kapit-tuko sa kapangyarihan.

Muling sumasainyo, ito po si  Sarah Raymundo, guro ng Unibersidad ng Pilipinas at aktibista ng Bagong Alyansang Makabayan. Tandaan po natin Ang pagpili ng maka-mamamayan at makabayang mga kandidato na matapang na tutunggali sa tiraniya ay nararapat lang sabayan ng bawat mamamayan ng pakikipagkaisa sa pagbubuo at pagpapalakas ng malawak na kilusang masana nagsasabing “Duterte, wakasan na!”

End

Itanong Mo Kay Prof: Masbate Incident at CARHRIHL

Panayam kay Prof. Jose Maria Sison ng Kodao Productions, sa pamamagitan ni Prof. Sarah Raymundo, hinggil sa insidente sa Masbate at ang bisa ng CARHRIHL.

IMKP: MASBATE INCIDENT AT CARHRIHL
June 22, 2021

Sarah: Magandang araw sa lahat ng ating mga tagapakinig, nagbabalik ang Itanong Mo Kay Prof, kasama natin ang Chair Emeritus ng International League of Peoples’ Struggle at NDFP Chief Political Consultant na si Prop. Jose Maria Sison. Magandang araw, Prof Sison, at maraming salamat sa pagkakataong makapanayam kayong muli para sa isang napakahalagang usapin na may kinalaman sa kondukta ng pakikibakang armado ng rebolusyonaryong hukbo sa Pilipinas ang NPA, paritukular ang nangyari sa Masbate.

JMS: Maalab na makabayang pagbati sa iyo Prop. Raymundo, sa Kodao at sa lahat ng ating tagapakinig.

Sarah: Sa ngalan ng Itanong Mo Kay Prof, nagpapaabot po ako ng taos-pusong pakikiramay sa pamilya ng mga nasawi nating kababayan at nakikiisa po ang aming programa sa pakikidalamhati sa ating mga kababayan sa trahedyang ito.

Sa panayam na ito, sisikapin nating makuha ang suri at ilang resolusyon ng NDFP batay sa mga naaangkop na mga dokumentong may lokal at internasyonal na saklaw na nakatuon sa mga sirkumstansya ng gerang sibil są mga bansang tulad ng Pilipinas kung saan may pwersang nagsusulong ng rebolusyonaryong pakikibaka para sa pambansang paglaya.

Halina at alamin natin ang kahalagahan ng Joint Monitoring Committee (JMC), ang Comprehensive Agreement on Human Rights and International Humanitarian Law (CAHRIHL), ang The Hague Declaration, at ng Ottawa Treaty. At kung bakit Usaping Kapayapaan ang pinanawagan ng mga taong-simbahan at iba pang grupo na nagtatanggol sa karapatang pantao, matapos maisapubliko ng insidente na hindi naman itinanggi kundi agad namang inako ng CPP-NPA. Bilang founding Chair ng CPP, ano kaya ang pagtingin ni Prop. Sison sa isyung ito?


Mga Tanong:

1. Ano ang masasabi nyo Prof Sison sa nangyari sa Masbate na kung saan ay may dalawang sibilyan na namatay dahil sa land mines na ginawa ng mga NPA? Meron na po bang resulta ang imbistigasyon ng CPP/NPA/NDF hinggil dito?

JMS: Isang trahedya na mga sibilyang magpinsan ng pamilyang  Absalon ay nasawi at isa pa ay  nasugatan dahil sa pagkakamaling pinasabog sa kanila ang command-detonated land mines.

Anuman ang klase ng sandata ay maling gamitin laban sa mga sibilyan. Ito ay mahigpit ng patakaran ng CPP, NPA, NDFP at rebolusyonaryong gobyerno ng bayan.

Gumawa na ng kagyat na pagsisiyasat ang partikular na kommand ng NPA sa Masbate na may kinalaman sa partikular na yunit at ilang indibidwal na may pananagutan sa malungkot na pangyayari. Tinanggap ng naturang komand na may pagkakamali.

 Pero gusto pa rin ng pinakamataas na organo ng NDFP na may mas malalim pang imbestigasyon para magkaroon ng batayan para litisin ang mga akusado sa court martial ng NPA o sa hukumang bayan ng rebolusyonaryong gobyerno ng bayan.

2. Maaari nyo po bang maipaliwanag Prof Sison kung meron po bang nilabag ang mga NPA sa land mines na kanilang isinagawa sa Masbate? Ano po ba ang implikasyon nito sa International Humanitarian Law?

JMS: Walang nilabag ng kabuaan ng NPA. Ang lumabag ay partikular na yunit ng NPA o iilang indibidwal na nagpaputok ng land mines. Ang mismong command-detonated land mines ay hindi ipinagbabawal ng Ottawa Treaty. Pero krimen o kamalian ang paggamit ng anumang sandata laban sa mga inosenteng sibilyan.

Sabi ng binanggit kong Masbate command ng NPA na command-detonated na land mines ang ginamit. Sa tamang paggamit ng ganitong land mines sa armadong kaaway ng NPA, hindi ipinagbabawal ng Ottawa Treaty at ng International Humanitarian Law.

Ang maliwanag na ipinagbabawal ng Ottawa Treaty ay yong land mines na sumasabog dahil sa presensya, presyur o kontak ng biktima. Ipinagbabawal ito dahil sa indiscriminate ang nabibiktima.

Sang-ayon at sumusunod ang CPP, NPA, NDFP at rebolusyonayong gobyerno ng bayan sa Ottawa Treaty. Patakaran ng buong kilusang rebolusyonaryo na bawal ang land mines na hindi command-detonated.

3. Hinggil po sa land mines, Prof Sison, maaari nyo po bang maibahagi ano po bang klase ng land mines ang tinatanggap sa International Humanitarian Law (IHL) sa mga lugar na may gera. Pinahihintulutan po ba talaga sa IHL ang pagtatanim ng bomba?

JMS: Sa International Humanitarian Law, ang Ottawa Treaty ang pinaka- partikular na instrumentong legal na nagsasabi kung anong klaseng land mines ang ipinagbabawal.

Ipinagbabawal nang kategorikal at pauli-ulit sa tratadong ito na bawal ang land mines na puputok dahil lamang sa presenya, presyur o kontak ng kahit sinong tao, inosenteng sibilyan o armadong kaaway ng NPA sa kasalukuyang gera sibil sa Pilipinas. Hindi ipinagbabawal ang command-detonated land mines.

4. Ano po ang inyong masasabi sa kahilingan ng gubyerno sa pamamagitan ni DILG Sec Eduardo Año na isurender sa kanila ang mga NPA na nagkasala sa naganap na pagsabog sa Masbate?

JMS: Alinsunod sa International Humanitarian Law at Comprehensive Agreement on Respect for Human Rights and International Humanitarian Law, ang NDFP ang may hurisdiksyon sa anumang paratang laban sa NPA at mga yunit nito at ang GRP naman ang may hurisdiksyon sa mga paratang laban sa AFP, PNP, paramilitar at mga yunit nito.

Ang NDFP at GRP ay mga co-belligerents sa isang gera sibil o armed conflict na saklaw ng Geneva Conventions. Hindi pwedeng utusan ng GRP ang NDFP na isurender sa GRP ang yunit ng NPA na gumawa ng pagkakamali sa Masbate.

Ang GRP ay hindi rin puedeng utusan ng NDFP na isurender sa kanya ang mga akusado sa higit ng 6000 paratang laban sa AFP at PNP na sometido sa Joint Monitoring Committee sa ilalim ng CARHRIHL.

Hindi ring pwedeng utusan ng NDFP ang GRP na isurender sa NDFP ang mga armadong tauhan ng GRP na pumaslang ng napakaraming NDFP peace consultant. Tinutukoy ang pagpaslang kina Randy Felix Malayao, Randall Echanis, Julius Giron, mag-asawang Cabanatan, mag-asawang Topacio, Reynaldo Bocala at iba pa.

May kanya-kanyang sistema ng gobyerno at batas ang GRP at NDFP. Sira-ulo ang mga opisyal at ahensya ng reaksyonaryong gobyerno na gustong magmando sa NDFP na isuko sa GRP ang mga akusado sa insidente ng command-detonated land mines sa Masbate.

5. Ang Comprehensive Agreement on Respect for Human Rights and International Humanitarian Law o mas kilala sa tawag na CARHRIHL ay isang kasunduan na pinirmahan ng gubyerno ng Pilipinas at ng National Democratic Front of the Philippines noong 1998. Ayon sa AFP hindi na ito epektibo dahil wala ng negosasyon sa pagitan ng GRP at NDFP, at matagal na ring nilusaw ang Joint Monitoring Committee o JMC. Ano po amg inyong opinyon hinggil dito Prof Sison? May halaga pa po ba ang CARHRIHL sa panahon ngayon?

JMS: Umiiral pa ang CARHRIHIL dahil sa maraming probisyon nito ay hango sa international law sa human rights at humanitarian conduct at nasa balangkas ng international law na tinanggap ng GRP Constitution. Umiiral at bukas din ang opisina ng NDFP-nominated section ng JMC sa Cubao at kinikilala at sinusuportahan pa ng Royal Norwegian Government.

Totoo na ang GRP ay nagsara ng kanyang opisina sa JMC. Pero hindi ibig sabihin nito na malayang gumawa ng mga krimen ang GRP sa mga pwersa at tauhan ng NDFP. Hindi rin ibig sabihin na  nawalan na  ng hurisdiksyon ng NDFP sa mga pwersang nasa panig niya.

Subukan ng GRP na magpadala ng arresting yunit nila sa erya ng NPA sa Masbate at tingnan natin kung ano ang mangyayari. Kung gawin ng GRP ang panghihimasok, hwag magulat kung lalabanan sila ng NPA.

6. Sa panghuli, Prof Sison, ano po ang inyong panawagan sa ating mga kababayan?

JMS: Hanggang ngayon ipinagmamatigas at ipinagmamalaki ni Duterte na tinapos at pinatay na niya ang peace negotiations at gusto niya ang gera total at pakana niyang idahilan ang armadong rebolusyon para magpataw ng pasistang diktadura sa Pilipinas.

Napakalimitado na ang panahon na umasa ang sinuman na magbabago ang patakaran ni Duterte. Nasa huling taon na ang halimaw sa kanyang legal term of office.

Mas mabuting palakasin ang kilusan ng mga mamamayan para patalsikin sa poder ang traidor, berdugo, mandaranbong at maggagantsong rehimen ni Dutere at makipagsundo sa oposisyon na itaguyod ang patakaran na buksan muli ang peace negotiations ng GRP at NDFP para lutasin ang mga problema na ugat ng gera sibil.

Magkakaroon ang makatarungan at matibay na kapayapaan kung may peace negotiations muli at gumawa ng mga komprehensibong kasunduan tungkol sa mga batayang repormang sosyal, ekonomiko at pulitikal sa balangkas ng The Hague Joint Declaration ng GRP at NDFP.

JMS: Sa pagtatapos ng ating panayam, nagpapasalamat ako kay Prop. Raymundo, sa Kodao at sa lahat ng ating tagapakinig.

Sarah: Maraming-maraming salamat po Prof. Sison para sa isang malaman at ubod ng linaw na pagpapaliwanag. Ang mga nabanggit na mga ahensya at pinagkaisahang dokumento na tunog-teknikal sa una, ngayon ay may malinaw nang hugis kaugnay ng trahedya sa Masbate at gayon na rin sa kabuuang kondukta ng armadong tunggalian sa pagitan ng GRP at CPP-NPA.

Itanggi man ng gobyernong Duterte, maging ng mga anti-komunista at iba pang mga grupo na nananawagan ng maka-isang panig na resolusyon sa trahedyang ito, hindi na maikakaila ang bisa ng mga tratado o treaty at dokumentong sumasaklaw sa kondukta ng armadong tunggalian.

Walang silbing i-etsa pwera sa diskusyon ang dual state power sa bansa, o ang realidad na may dalawang gobyerno sa Pilipinas na sangkot sa isang armadong tunggalian. Hindi ito tungkol durugan o paggapi na solusyon ni Duterte. Walang kahihinatnan ang ganyang pusisyon dahil matagal nang nalikha ang mga opsiyal at lehitimong mekanismo para resolbahin ang mga usaping dulot ng tunggaliang ito. Ang mga mekanismong ito ay hindi pumapabor sa isang panig, kundi mga mekanismong nagbubukas upang talakayin, sawatahin, resolbahan ng dalawang panig ang mga umano’y abuso ng bawat panig, mga panukala ng bawat panig upang matugunan ang ugat ng armadong tunggalian. Sa puntong ito ng armadong tunggalian sa pagitan ng GRP at CPP-NPA walang ibang mekanismo ang maaaring makatugon dito kundi ang Usapang Pangkapayapaan o Peace Talks.

Hanggang sa muli, ito po si Sarah Raymundo, guro ng Unibersidad ng Pilipinas at aktibista ng Bagong Alyansang Makabayan. Ibayong pag-iingat at pakikibaka laban sa tiraniya.

-End-

Itanong Mo Kay Prof: ABS-CBN Franchise at PhilHealth Issues

Panayam ng Kodao Productions kay Prof. Jose Maria Sison sa pamamagitan ni Prof. Sarah Raymundo ng BAYAN National hinggil sa isyu ng ABS-CBN franchise at pagpapanukala ng PhilHealth Circular No. 2020-0014 o ang 3% mandatory contribution sa mga OFWs.

IMKP: Hinggil sa Comprehensive Agreement on Social and Economic Reforms (CASER)

Panayam kay Prof. Jose Maria Sison ni Prof. Sarah Raymundo para sa Kodao Productions.

ITANONG MO KAY PROF
Topic: CASER
4 February 2020

Prof Sarah: Magandang Araw sa ating mga tagapakinig! Sa gitna ng lumalalang krisis pang-ekonomiya at mga pang-araw-araw na pangamba dala ng kahirapan, kawalan ng trabaho, abuso sa mga manggagawa, mga sakuna, virus at paglabag sa ating mga karapatan, may paraan pa nga ba para umalagwa ang bayan?

Sa mga nakaraan nating pakikpanayam sa Chair Emeritus ng ILPS at panghunahing konsultant sa Usapang Pangkapayapaan, na si Professor Jose Maria Sison, atin nang napag-usapan ang Peace Talks. Sa pamamagitan ng Peace Talks, maaaring mapag-usapan ang mga alternatibo at repormang maaaring pagtulungan ng gobyerno at ng kilusang rebolusyonaryo na kinakatawan ng CPP-NPA-NDFP. Ngunit matindi ang pambabara rito lalo na ng mga personaheng nagmumula sa mga militar. Bakit kaya?

Bukod diyan, matindi rin ang pagtutol ng mga elemento ng militar sa CASER. Ano ba ang mayroon sa CASER at ayaw kumasa ng militar o ng gobyerno rito? Paano umaangkop ang rebolusyonaryong kilusan sa mga repormang dapat na maisaktuparan sa ikauunlad ng taumbayan. Sa panayam na ito, unawain natin kung bakit mahalaga para sa NDFP, maging sa CPP at NPA ang mga kagyat na reporma para sa ikauunlad ng bansa.

JMS: Maalab na makabayang pagbati sa inyo Prop. Sarah Raymundo at sa lahat ng ating tagapakinig.

Mga Tanong

SR1: Prof Sison, ang isa sa tinatalakay sa usapang pangkapayapaan sa pagitan ng Government of the Republic of the Philippines o GRP at ng National Democratic Front of the Philippnes o NDFP ay ang tungkol sa Comprehensive Agreement on Socio-Economic Reforms o mas kilala sa tawag na CASER. Maaari po bang ipaliwanag muna natin sa ating mga tagapakinig, ano po ang ibig sabihin ng CASER.

JMS: Ibig sabihin ng CASER ay Comprehensive Agreement on Social and Economic Reforms o Komprehensibong Kasunduan sa mga Repormang Panlipunan at Pang-Ekonomiya. Pangunahing nilalaman nito ang tunay na reporma sa lupa at pambansang industrialisasyon. Sinasabi ng mga negotiating panel ng GRP at NDFP, mga peace advocates at malawak na masa na ang CASER ay laman ng makatarungang kapayapaan.

SR2: Ano ang pakinabang ng mamamayang Pilipino kapag napirmahan na ng dalawang panig ang CASER?

JMS: Sa ilalim ng CASER, isasakatuparan ang tunay na reporma sa lupa na kaiba sa kasalukuyang bogus na land reform. Ipapamahagi ang lupa sa mga magsasakang walang lupa o kulang sa lupa mula sa public domain at mula sa mga lupang pag-aari ng mga asendero o panginoong maylupa na bibilhin ng gobyerno sa mababang presyo at ipamumudmod ito sa mga magsasaka sa kaya nilang presyo. Hindi katulad ngayon na hindi kayang bayaran ng mga magsasaka ang lupang ipinamamahagi sa ilalim ng bogus na land reform ng gobyerno.

Sa ilalim din ng CASER, isasakatuparan ang pambansang industrialisasyon. Magkakaroon ang Pilipinas ng kasarinlan sa ekonomiya, mapapangalagaan ang pambansang patrimonya sa likas na yaman at paggamit nito at gayundin ng pag-unlad sa industriya. Itatayo ang mga industriya na may kapabilidad na gumawa ng mga makinang kagamitan sa pagmamanupaktura at mga pangunahing sangkap, tulad ng mga metal, kimika at elektronika, at mga manupakturang kinakain at ginagamit ng karaniwang tao.

Sa gayon, uunlad ang Pilipinas tulad ng mga industrialisadong bansa, tulad ng Amerika, Hapon, Tsina, Europa at Korea. Lilikha ang mga ito ng trabaho para sa milyun-milyong kababayan na walang trabaho o kulang sa trabaho sa kanayunan at kalunsuran. Giginhawa ang sambayanang Pilipino mula sa kasalukuyang kalagayan ng inaapi at pinagsasamalantalahan ng mga dayuhang monopolyo, malalaking komprador at asendero at mga korap na opisyal sa burukrasya at sa militar.

SR3: Ang sabi po ni Presidential Peace Adviser Carlito Galvez Jr., paso na raw po ang laman ng CASER, wala ng halaga ang mga nilalaman nito at ang Communist Party of the Philippines lang daw po ang makikinabang dito. Ano po ang inyong pagtingin sa bagay na ito, Prof Sison?

JMS: Hindi totoo ang sabi ni General Galvez. Sinungaling siya. Malakolonyal at malapyudal ang Pilipinas. Pinalubha ito ng tinawag na neoliberal globalization, ang patakarang pinabilis ang pag-ipon ng kapital sa kamay ng mga dayuhang monopolyo at malalaking komprador at asendro sa pamamagitan ng pagpapababa sa antas ng pasahod. Lalong hinaharang ang tunay na reporma sa lupa at pambansang industrialisasyon. Lalong nakikinabang ang mga halimaw sa pagsasamantala sa mga manggagawa, magsasaka at pati na mga nasa gitnang saray ng lipunan. Ito ang dahilan ng pagkaatrasado ng ekonomiya ng Pilipinas.

Ilinuluwas ng mga imperyalista at mga mapagsamantalang uri ang kayamanan ng Pilipinas sa anyo ng supertubo at sa pamamagitan ng kalakalang kolonyal. Nagluluwas ng hilaw na sangkap at murang paggawa at nag-aangkat ng mga yaring produkto pati na ang mga gamit na panluho ng mga nagsasamantalang uri.

Kapag may tunay na land reform, ang makikinabang ay mga magsasaka at buong bansa na magkakaroon ng sapat na pagkain at malawak na palengke ng mga manupaktura ng bansa. Kapag may pambansang industrialisasyon, ang makikinabang ay mga mangagagawa, mga taong walang trabaho na magkakaron ng trabaho at buong bansa na makikinabang sa pagtaas ng antas ng kaunlaran at ginhawa sa kabuhayan.

SR4: Ayon naman kay National Security Adviser Hermogenes Esperon Jr., hindi tutuo na isasalba ng CASER sa kahirapan ang mamamayang Pilipno. Ang lahat ng nakatala sa CASER ay pulos kaisipang komunismo. Tatanggalin din nito sa serbisyo ang mga elemento ng Armed Forces of the Philippines o AFP at tanging ang New People’s Army o NPA lang ang makikinabang sa CASER dahil ang mga ito ang magpapatupad ng agrarian reform. Ano po ang masasabi ninyo sa pahayag ni Esperon, Prof. Sison?

JMS: Bobo si General Esperon. Hindi komunismo ang tunay na land reform at pambansang industrialisasyon. Patriotismo ito at mga repormang ito ay burges-demokratiko pa. Hindi man sosyalismo ang mga repormang ito. Lalong malayo sa komunismo. Walang nalalaman at sinungaling itong si Esperon.

Kapag nagkaroon ng mga makabayang reporma tulad ng tunay na reporma sa lupa at pambansang industrialisasyon, makikinabang pareho ang mga sundalo ng AFP at mandirigma ng NPA at mga pamilya nila tulad ng lahat ng mamamayan. Kapag nagkaroon talaga ng mga repormang ito, hindi na kailangan na maglabanan pa ang AFP at NPA.

Mawawala na ang dahilan ng guerra sibil o sandatahang labanan. Ang lumalaking badyet para sa militar ay puede nang ilagay sa pagtatayo ng mga industriya at mga kooperatiba sa agrikultura. Wala nang pag-aaksaya ng pondo ng bayan at maramihang pamamaslang na ginagawa ng militar na utusan lamang ng mga imperyalista at mga papet nitong pulitiko sa ating bayan.

SR5: Para po sa kapatiran ng ating mga tagapakinig, sina Galvez at Esperon po ay mga dating Chief of Staff of the Armed Forces of the Philippines o AFP. Pareho silang ayaw ng ipagpatuloy ang peace talks sa ating bansa. Pareho silang nananalig na kakayanin ng gubyerno na tapusin ang insurhensiya sa bansa at maaaring gawin ang local peace talks sa mga rehiyon. Ano po ang inyong opinyon Prof Sison hinggil sa bagay na ito?

JMS: Habang nananatili ang pang-aapi at pagsasamantala ng mga dayuhang kapitalista, mga malaking komprador at asendero sa mga anakpawis at sa sambayanang Pilipino, lalong lalaki at lalakas ang rebolusyonaryong kilusan ng sambayanang Pilipino at hindi makakayang supilin o linlangin ng militar ng kontrarebolusyonaryong estado.

May pambansang katangian at saklaw ng mga batayang problema na naging sanhi ng pagrerebolusyon ng masang Pilipino. Kung gayon, ang karapatdapat na mag-usap sa peace negotiations ay mga negotiating panel na inatasan ng GRP at NDFP sa pambansang antas. Ang mga reporma na kinakailangang pag-usapan at pagkasunduan sa ekonomiya, pulitika at konstitusyon ay may pambansang saklaw.

Kung gayon, ang lahat ng organo ng CPP at kumand ng NPA sa lahat ng antas, magmula sa pinakamababa hanggang sa pinakamataas, ay tumanggi na sa alok ng tinawag na localized peace talks. Kinokondena nila ito bilang isang mapanlinlang at malisyosong pakana ng mga militarista at pasista para hatiin ang kilusang rebolusyonaryo at isang patibong para magpasurender at patayin ang mga magsurender tulad sa Oplan Tokhang.

Walang localized peace talks na nangyayari kundi photo-ops ng mga militar at mga asset nila o mga pamiting ng mga sibilyan sa utos at pananakot ng militar. Pagkatapos palilitawin nilang mga nag-surrender ang mga nasa retrato o list of attendance para ibulsa ng mga opisyal na militar ang pera mula sa tinawag na E-CLIP o mula sa intelligence at discretionary fund. Raket lamang ng militar ang pekeng localized peace talks.

Dating raket na ito tulad ng PAMANA conditional cash transfer na pinalaki lamang. Walang taong naloloko nito dahil sa maliwanag ang mga militar ang nagbubulsa ng malaking bahagi ng pera para sa mga tinawag sa surrenderers at pagkatapos papatayin nila ang ito para makakuha pa ng mas malaking pera.

Yong mga mas tusong military officer nag-iimbento sa papel ng mga listahan ng nagsurrender at napatay sa mga pekeng engkwentro. Katawa-tawa na ipinaghahambog ng rehimeng Duterte na maraming ulit sa aktwal na bilang ng mandirigmang NPA ang nagsurrender at pinatay. Madalas ang aktwal na pinapatay ay mga sibilyan na sinisiraan muna ng red-tagging sa ilalim ng National Task Force-ELCAC.

SR6: Isang mahalagang paksa na naman ang ating tinalakay sa araw na ito. Ano po ang inyong ipapabaon sa ating mga tagapakinig, Prof Sison?

JMS: Tapos na ang mas malaking bahagi ng termino ni Duterte. Nasa takipsilim na ang administrasyon niya. Sinikap nitong patayin ang kilusang rebolusyonaryo ng sambayanang Pilipino. Subalit hindi lang siya bigo, lalo pang lumakas ang rebolusyon. Tumpak na tawagin siyang best recruiter ng NPA dahil sa lalong dumami ang armadong rebolusyonaryo dahil sa ibayong pagsasamantala at pagmamalupit sa mga mamamayan.

Wasto ang kapasyahan at tunguhin na lumaban kayo, mga kababayan, hanggang tagumpay. Nasa inyong pakikibaka ang pagkakamit ng pambansang kalayaan at tunay na demokrasya. Kung sakali mang magkaroon ng peace negotiations sa pambansang antas huwag kayong manlubay sa pakikibaka habang hindi ipinapatupad ang anupamang kasunduan ukol sa mga repormang batayan ng makatarungang kapayapaan.

Habang paliit na ang panahon ni Duterte sa kapangyarihan, lalong huwag tayong umasa na handa siyang makipag-usap para sa makatarungang kapayapaan. Napapalibutan siya ng mga militaristang heneral na katulad niyang berdugo at papet ng mga imperyalista. Kung magpataw ng pormalisado at lubusang pasistang diktadura sa Pilipinas ang mga nasa kapangyarihan, paigtingin pang lalo ang ating paglaban hanggang makamit ang ganap na tagumpay.

JMS:: Mga kababayan, nagpapaalam ako sa inyo hanggang sa susunod na panayam namin ni Prop.Sarah Raymundo. Maraming salamat sa inyong pakikinig. Mabuhay kayo!

Prof Sarah: Maraming maraming salamat po Prof. Sison sa inyong matalas at malinaw na pagtatalakay ng mga isyu na kaugnay ng CASER o Comprehensive Agreement on Social and Economic Reforms.

Matagal na debate kung paano ba babaguhin ang lipunang Pilipino: reporma o rebolusyon? Para sa mga kagaya nina Esperon at Galvez, masama ang rebolusyon, masama rin ang reporma tulad ng CASER. Kung gayon, pinagtatanggol lang nila ang namamayaning sistema. Batid naman ng mga rebolusyonaryo na kinakailangan ang pagpapatupad ng mga repormang makatutugon sa pangangailangan ng taumbayan sa proseso ng pagkakamit ng rebolusyonaryong pagbabago.

Kung ano ang inilawak at iniluwang ng puwang sa alternatibo na inilalaan ng NDFP sa usapin ng CASER para sa Peace Talks ay gayon na lang ang kitid at makaisang-panig ang pananaw ng mga elemento ng militar na kumakatawan sa gobyerno sa usaping ito, walang pinagkaiba sa pananakal na ginagawa ng gobyerno sa sambayanang Pilpino. Taglay ng CASER ang paunang hakbang sa pagkamit sa ekonomiko at panlipunang hustisya. Isulong natin ito kasabay ang panawagan sa Peace Talks.

Ito po si Sarah Raymundo, aktibista ng Bagong Alyansang Makabayan o BAYAN at guro ng Unibersidad ng Pilipinas-Diliman. Maraming salamat sa inyong pakikinig at hanggang sa muli dito sa Itanong Mo Kay Prof.

End

Itanong mo kay Prof: Political persecution sa mga lider-aktibista

Sa episode na ito ng Itanong mo kay Prof, ipinaliwanag ang ibig sabihin ng political persecution at bakit target nito ang mga progresibong lider tulad nila Liza Maza, Satur Ocampo, Rafael Mariano at Teddy Casiño.

ITANONG MO KAY PROF: ITLOS at ang panalo ng Pilipinas laban sa China

Lubos ang kaligayahan ng sambayanang Pilipino sa pagkakamit ng tagumpay sa kaso ng Pilipinas laban sa panghihimasok ng Tsina sa West Philippine Sea. Bigo ang Tsina sa pang-aagaw sa syento porsyento ng ating extended continental shelf at 80 por syento ng ating exclusive economic zone.

Napatunayan batay sa malakas na ebidensya na boladas lamang ang ipinangangalandakan ng Tsina na istorikong karapatan sa umanoy undisputable sovereignty o lubusang pagmamay-ari sa halos buong South China Sea na isang taguri lamang ng Ingles na tagagawa ng mapa. Mahalagang matalakay natin ang ating panalo at kung ano pa ang magagawa natin para tuluyang manaig ang ating mga karapatan sa harap ng pagbabanta at propaganda ng Tsina. Read more

ITANONG MO KAY PROF: Podcast on peace talks under Duterte

PODCAST: Usapang Pangkapayapaan

Intro ni Prof. Sara: Magandang araw sa lahat ng tagapakinig ng ating programang Itanong Mo Kay Prof! Muli nating makakapanayam ang founding chairperson ng Communist Party of the Philippines, Chief Consultant ng National Democratic Front of the Philippines para sa Usapang Pangkapayapaan, walang iba kung hindi si Propesor Jose Maria Sison.

Opening Spiel ni Prof. Sarah: Malugod na sinasalubong ng mga makakaliwang puwersa sa lipunang Pilipino ang mga progresibong pahayag  ni Mayor Rodrigo Duterte mula nang lumitaw na siya ang binoto ng milyung-milyong Pilipino sa isang eleksyong napakataas ng bilang ng mga mamamayang lumahok sa proseso at bumoto ng kanilang mga kandidato. Bukas sa Kaliwa si President-elect Duterte, napakalayo sa disposisyon ng papalitan niyang si President Noynoy Aquino na popular na halal din ng mamamayan, pero sagad ang pagkareaksyunaryo at anti-mamamayan.

 Maituturing na matatapang na hakbang ang ginagawa ni Duterte upang abutin ang Kaliwa, isang puwersa sa lipunang Pilipino na may malawak at malalim na kaugnayan sa pangaraw-araw na buhay ng masang Pilipino, lalo na ng masang anakpawis.

 Nariyang magdesisyon si Duterte na isalalay sa CPP ang pagrerekomenda ng dalawang mahalagang pusisyon sa gabinete, ang DAR at ang DSWD. Dalawang kilala at beteranong aktbista ng Pambansa Demokratikong Kilusan ang gagampan dito, si Cong. Ka Paeng Mariano ng Anakpawis Partylist, kilala ring mass lider ng KMP. At si Propesor Judy Taguiwalo ng UP at Alliance of Concerned Teachers, aktibista ng Martial Law, nag-underground upang magorganisa ng masang titindig laban sa diktaturyang Marcos, naging bilanggong pulitikal. Hindi nalalayo sa tono ng Kaliwa, di lang minsang naipahayag at naipakita ni Duterte ang kanyang kawalan ng interes sa pagpapakatuta sa dayuhang imperyalista, ang US.

 Ngunit higit sa lahat, nagdeklara si Duterte na magkakaroon ng Usapang Pangkapayapaan sa pagitan ng administrasyon at ng CPP-NPA-NDF. Para sa CPP-NPA-NDF at mga laksa-laksang mamamayan, ito ang tinatayang pinakamahalagang ebidensya ng sinseridad ni Duterte upang patunayan ang kagustuhan niyang magpatupad ng mga pagbabago. “Change is coming” ang sabi pa nga ng kanyang campaign slogan.

Pagusapan natin ang Usapang Pangkapayapaan kasama si Prop. Jose Maria Sison. Maalab na pagbati, Prof. Jose Maria Sison!

JMS: Maalab na makabayang pagbati sa lahat ng ating kababayan! Napapanahon po at angkop ang paksa ng panayam na ito tungkol sa usapang pangkapayapaan. Matagumpay na naisagawa namin ang preliminary talks sa Oslo noong Hunyo 14 at 15 para ihanda ang resumption ng formal talks sa ikatlong linggo ng Hulyo.

Prof. Sarah: 1. Prof. Sison, bago po tayo magpalawig sa isyu ng usapang pangkapayapaan, maaari po bang maipaliwanag muna natin sa ating mga tagapakinig ano ang ibig sabihin ng peace talks o usapang pangkapayapaan?

JMS: Ibig sabihin po ng usapang pangkapayapaan ay negosasyon sa pagitan ng Government of the Philippines (GPH) at National Democratic Front of the Philippines (NDFP) para gumawa ng mga kasunduan  na naglulutas sa mga problemang naging dahilan ng gera sibil sa pagitan ng dalawang panig. Batay sa mga kasunduan, matitigil ang sandatahang labanan at magkakaroon ng makatarungan at matibay na kapayapaan sa ating bayan.

Prof. Sarah: 2. Bakit po ito ginagawa ng Gubyerno ng Pilipinas at ng National Democratic Front of the Philippines? Ano po ba ang mga pinag-uusapan ng dalawang panig at bakit ito sinusubaybayan ng ating mga kababayan?

JMS: Ginagawa ng Gobyerno ng Pilipinas at ng National Democratic Front of the Philippines ang usapang pangkapayapaan dahil sa tulak ng sambayanang Pilipino at dahil sa matinong pag-iisip na mas mabuting  harapin  ang mga problemang dahilan ng gera sibil, magkaroon ng kapayapaan at magkaisa sa pagsasakatuparan ng mga pundamental na reporma sa lipunan, ekonomya at pulitika.

Sinusubaybayan ng lahat ng ating kababayan ang usapang pangkapayaan dahil sa tumitinding krisis at hirap ng buhay at nais nilang magkaroon ng makabuluhang  pagbabago sa pamamagitan ng mga reporma. Nais nilang mapalaya sa garapal na pang-aapi at pagsasamantala. Nais nilang marespeto ang mga pambansa at demokratikong karapatan at interes nila. Nais nilang magkaroon ng pag-unlad ng ekonomya sa pamamagitan ng pambansang industrialisasyon at tunay na reporma sa lupa at iba pang reporma.

 Prof. Sarah: 3. Ano naman ang ibig sabihin ng preliminary talks, kagaya ng naganap sa Oslo, Norway nitong June 14 at 15 na dinaluhan ng mga bagong ng GPH peace negotiators na sina Jesus Dureza,Silvestre Bello III at Hernani Braganza para makipag-usap sa NDFP?

JMS:  Preliminary talks ang tawag sa aming pag-uusap sa Oslo dahil kailangang linawin at ihanda muna ang  adyenda ng formal talks na muling isasagawa sa panahon ng papasok na administrasyon ni Presidente Duterte. Nabimbin ang usapang pangkapayapaan sa mahabang panahon dahil sa pagsabotahe nina Aquino at OPAPP secretary Deles. Mauumpisahan muli ang  formal talks kapag mag-umpisa na ang panunungkulan ng bagong administrasyon.

Prof. Sarah: 4. Maaari po ba ninyong maibahagi sa amin ano ang makabuluhang inabot ng preliminary talks sa pagitan ng GPH at NDFP noong June 14 at 15?

JMS: Mababasa sa Joint Statement ang bunga ng preliminary talks. Itinakda nito ang adyenda ng formal talks sa Hulyo. Kasama sa adyenda ang apirmasyon ng mga dating kasunduan magmula sa The Hague Joint Declaration, ang balak na pabilisin ang usapang pangkapayapaan, ang pagpapalaya sa mga political prisoner sa pamamagitan ng general amnesty at ang interim ceasefire o pansamantalang pagtigil ng putukan.

Itinakda rin sa Joint Statement na palayain agad ang mga nakabilanggong consultant ng NDFP para makasama sila sa formal talks alinsunod sa Joint Agreement on Safety and Immunity Guarantees (JASIG). Isasabay na rin ang pagpapalaya ng mga political prisoner na may sakit, matatanda at mga babae.

Prof. Sarah: 5. Sa kabila po ng sinseridad na ipinapakita ni Presidente Duterte sa usapin ng pakikipagkaisa sa mga “left” at ang pag-uumpisa ng peace talks, meron pa ring mga naninira at bumabatikos na hindi umano magtatagumpay ang usapang pangkapayapaan. Ano po ang inyong opinyon hinggil dito, Prof. Sison?

JMS: Mas malaki ang posibilidad ngayon na umabante ang usapang pangkapayapaan hanggang sa matagumpay na kongklusyon dahil sa may mas mataas na antas ng political will o determinasyon ni Duterte kaysa sa mga nakaraang presidente na gawin ang dapat gawin para sumulong ang usapan at pagkakasundo. Malaki ang pag-unawa niya sa makaturangang layunin ng rebolusyon dahil naging estudyante ko siya at naging miembro ng Kabataang Makabayan.

Naging opisyal ng  Nationalist Alliance for Justice, Freedom and Democracy noong 1986 at ng Partido ng Bayan noong 1987. Tatlong dekada ang haba ng magiting at maparaang kooperasyon niya sa kilusang  rebolusyonaryo sa Davao City.  Tinanggap niyang maging NDFP resource person noong 2012 hanggang sinabihan ng DILG na magwithdraw siya.May kabutihang loob siya. Siya ang nagboluntaryo na palayain ang lahat ng political prisoner sa pamamagitan ng general amnesty. Gayundin inalok niya ang apat na cabinet post sa NDFP.

Prof. Sarah: 6. Magkakaroon po ba ng tigil-putukan o ceasefire sa pagitan ng AFP/PNP at NPA sa panahon ng formal peace talks? Paano po ito pinagkakaisahan ng dalawang panig – GPH at NDFP at gaano ito katagal? Magsisiuwian ba ang mga armadong pwersa ng CPP/NDFP at ano ang kanilang gagawin sa panahon ng tigil-putukan?

JMS: Magkakaroon ng tigil putukan o ceasefire sa pagitan ng AFP/PNP at NPA sa panahon ng formal peace talks. May panimulang pag-uusap na tungkol sa modo o anyo ng ceasefire: mutual interim ceasefire agreement ba o independent but simultaneous ceasefire declarations bilang panimulang hakbang. Pag-uusapan pa ito nang masinsinan sa formal talks sa Hulyo.

Hindi magsisiuwian ang mga Pulang kumander at mandirigma ng NPA.  Para hindi sila mayamot habang may ceasefire: patuloy ang gawaing masa, politico-military training, produksyon, health program, cultural work, pagbabantay sa environment at likas yaman ng ating bayan, pagsugpo sa kriminalidad (laluna ang ilegal na droga at pagnanakaw) at pagpigil sa pang-aapi at pagsasamantala. Nananatili ang karapatan sa self-defense.  Ang matitigil ay mga sinadyang military campaigns and operations laban sa kabilang panig.

Prof. Sarah: 7. Sa tingin po ba ninyo Prof. Sison mababawasan na ang human rights violations ngayong mauupo na sa Malakanyang si Presidente Duterte? Ano po ang relasyon nito sa usapang pangkapayapaan?

JMS: Malaki ang mabawas na human rights violations kung wala nang military campaigns at operations na inilulunsad ng AFP, PNP at mga auxiliary forces laban sa NPA at sa masang anakpawis at mga katutubong komunidad. Sa gayon, mapapahusay ang atmosphere para sa usapang pagkapayapaan. Tungkol naman sa anti-criminality campaign ni President Duterte, may nagsasabing magbubunga ito ng maraming human rights violations.

Sa political campaign style ni Duterte, mahilig siya sa hyperbole tulad ng patabain niya ang mga isda sa Manila Bay para takutin ang mga kriminal at makuha niya ang sentimyento ng masa ng electorate. Pero tandaan na abogado at matalino siya. Alam niyang bilang Presidente na nakapokus sa kanya ang national at international attention. Aayaw yan sa peligro na masisiraan siya sa maraming paratang ng human rights violations.

 Sa takbo ng usapang pangkapayapaan at sa pag-unlad ng ceasefire at cooperation, nasa lugar ang NDFP na paalalahanan ang gobyernong Duterte na itaguyod at irespeto ang mga karapatang tao. Pagdating ng yugto na pagbubuo ng pambansang konseho at gobyerno ng pambansang pagkakaisa, kapayapaan at pag-unlad lalaki ang papel ng mga demokratikong pwersa sa loob at labas ng gobyerno.

Prof. Sarah: 8. Hinggil po sa planong pag-uwi ninyo sa Pilipinas Prof Sison, magkakaroon po ba ng problema o epekto sa usapang pangkapayapaan kung hindi kayo matutuloy na makabisita sa ating bayan? Ano na po ang iyong pananaw hinggil sa mga nang-uupat sa inyo na ginagamit nyo lang daw si Presidente Duterte para sa inyong kapakinabangan?

JMS: Kausap ko pa ang mga kasama at mga abogado kung ano ang mga legal precautions, security measures, kailan at gaano katagal ako makakadalaw sa Pilipinas. Mientras na hindi pa ako dadalaw sa Pilipinas, walang negatibong epekto sa usapang pangkapayapaan dahil sa ito naman ay gagawin sa Oslo at kung kinakailangan sa iba pang neutral venue abroad alinsunod sa existing agreement.

Mas mapanganib sa usapang pangkapayapaan kung ako ay uuwi at may masamang mangyari sa akin. May mga peace spoilers  na nag-aabang sa pagkakataong gumawa ng karahasan para mang-intriga at manggulo. Para maiwasan ito, puede pa ring magkita kami ni President Duterte sa Europe kapag magstate visit siya sa Norway, Netherlands at Vatican.

Parehas kami ni President Duterte na may pananaw na sikapin nating magkakaroon ng malaking pagbabago para sa kabutihan ng sambayanang Pilipino. Sabi niya sa akin na muhing-muhi siya sa mga oligarko at dayuhang mapanghimasok at nais niyang magrebolusyon sa loob ng gobyerno. Sabi niyang siya ay Kaliwa at sosyalista.  Nasa kanya ang tungkuling patunayan  sa gawa ang kanyang salita. Magkakatulungan tayo habang ginagawa niya ang anumang mabuti para sa bayan.

 Prof. Sarah: 9. Ano po ang inyong mensahe sa ating mga kababayang nananalig sa kabutihang idudulot ng usapang pangkapayapaan sa pagitan ng GPH at NDFP?

JMS: Ibayong itaguyod ang usapang pangkapayapaan at  tiyakin na magkasundo sa mga reporma na dapat gawin laban sa mga imperyalista at malalaking komprador at asendero. Isulong ang mga pambansa at demokratikong karapatan at interes. Dapat magkaroon ng ganap na pambansang kasarinlan, demokrasya, pag-unlad sa ekonomya sa pamamagitan ng pambansang industrialisasyon at tunay na reporma sa lupa, hustisya sosyal, pinalawak na libreng edukasyong publiko at makabayan at progresibong kultura.

Sa unang pagkakataon sa buong kasaysayan ng Pilipinas, may presidente na nagsasabi sa bansa  na siya ay Kaliwa at sosyalista at nag-aalok ng apat na cabinet post sa Kaliwa. Nauna pa rito, sinabi niyang handa siyang magbuo ng coalition government na kasama ang mga komunista. Sikapin nating magkaroon ng isang pamahalaan ng pambansang pagkakaisa, kapayapaan at pag-unlad.

 Sagpangin ng sambayanang Pilipino at mga pwersang makabayan at progresibo ang mga pagkakataon na bunga ng  krisis ng naghaharing sistema, paglakas ng rebolusyonaryong kilusan at paglitaw ng presidenteng katulad ni Duterte. Nakakaintindi si President Duterte sa mga makabayan at progresibong simulain dahil dating kabilang siya sa Kabataang Makabayan, Nationalist Alliance, Partido ng Bayan at Bayan.

Maraming salamat po. Mabuhay kayo!

Extro ni Prof. Sarah: Maraming salamat sa ating mga tagapakinig, nawa ay nalinawan tayong lahat sa mga usaping may  kaugnayan sa kapayapaan at ibayong kumilos at magpakilos upang tiyakin ang tagumpay nito.

Tandaan natin, nanantiling instrumento ng mga naghaharing uri sa lipunan ang estado. Hangad ng mga komunista, ng mga pulang mandirigma ng New People’s Army, ng mga rebolusyonaryong organisasyon na binubuo ng mga magsasaka, manggagwa, estudyante, guro, taong-simbahan, migrante, kababaihan, kawani ng gobyerno, artista sa gawawing kultural sa ilalim ng NDF na durugin ang estadong nagsisilbi sa iilan, agawin ito, at magtayo ng isang gobyernong mangangasiwa para sa interes ng nakararami, isang lipunang malaya na tumutugon sa mga pangangailangan ng mamamayan at hindi ang nakagisnan nating nambubusabos sa sambayanan. Ang ganitong porma ng demokrasya, ang ganitong uri ng gobyerno ay hindi nakasalalay kay Presidente Duterte kundi sa ibayong pagsisikhay ng mga rebolusyonaryo, mga organisadong mamamayan na patuloy na mag-aral , mag-organisa, konsolidahin ang makapangyarihang puwersa ng pagbabago–ang lakas ng sambayanang Pilipino–hanggang sa tagumpay. Paydayon!

Ito po si Sarah Raymundo, guro sa Unibersidad ng Pilipinas, aktibista ng CONTEND at Alliance of Concerned Teachers. Mabuhay ang sambayanang Pilipino!

June 19, 2016

ITANONG MO KAY PROF: “Aquino is more brutal than Marcos in the case of political prisoners”

In this latest episode of Kodao’s podcast, International League of Peoples’ Struggles chairperson Prof. Jose Maria Sison said President Benigno Aquino is a “different kind of animal” for denying Eduardo Serrano his freedom even as it was already clear that charges against the political prisoner were false.

Sison also looks back at the Filipino people’s struggles and victories in 2015. He talks about the state of both local and global economy and how these affect the Filipino people; corruption and human rights violations under the Aquino government; the Papal visit and APEC conference; the successful campaign to stay the execution of Mary Jane Veloso; and others. He also challenges Filipinos to be vigilant in the coming national and local elections.

Listen as the country’s leading political scientist presents his views on many issues that affect the Filipino people.

ITANONG MO KAY PROF: Podcast on APEC 2015 (Part 3/3)

ITANONG MO KAY PROF
TUNGKOL SA APEC
October 22, 2015

Panayam ng Kodao Productions kay Prof. Jose Maria Sison sa pamamagitan ni Prof. Sarah Raymundo ng CONTEND UP Dilimam.

Mga tanong para kay Prop. Jose Maria Sison:
(Part 3/3)

7. Ano ang naghihintay sa kabataang Pilipino kung magtatagumpay ang programang ito ng APEC sa pamamagitan ng K to 12?

JMS: Sa pagsunod sa neoliberal na patakaran sa paaralan, babawasan ng gobyerno nang malaki ang gugulin sa edukasyong publiko at itutulak ang pribatisasyon sa edukasyon. Tumitindi ang operasyon ng mga pamantasang estado, mga kolehiyo at ibang mga paaralang publiko, at maging ng mga pribadong paaralang umano’y “non-profit,” para gawing napagkakakitaang mga negosyo, na kadalasa’y sa pakikipagtuwang sa malaking negosyo. Nauuwi ito sa pilipit na mga prayoridad na akademiko, mas matataas na tuition, paglabag sa mga karapatang guro at mag-aaral, at pasahol na kawalan ng panlipunang katarungan.

Para dagdagan ang sariling kakayahan sa kompetisyon at ganansya, nagtutuon ang mga kolehiyo at unibersidad sa mga programang mas maganansya at tinatapyas iyong itinuturing na nga kurso o paksang marhinal o kaya’y hindi kritikal (tulad ng sa humanities). Ikinukomersyo ang mga lupain nila, gusali, resulta ng mga pananaliksik at ibang mga rekursong kaalaman. Isinisiksik ang mas maraming kurso sa isang taon at bumabaling sa trimester para mas mabilis ang pagpapagradweyt. Sinasagad nila ang mga mag-aaral at guro sa pagtataas ng tuition at padadagdag ng pasaning trabaho, sa pamamagitan ng mas istriktong mga rekisito sa mga ipinagkakaloob (grant) at ipinauutang (loan), at sa paglimita ng sahod at benepisyo ng mga guro at ng mga hindi-nagtuturong kawani.

8. Ano ang panawagan ng International League of People’s Struggles sa mamamayang Pilipino kaugnay ng APEC meeting sa Pilipinas sa Nobyembre?

JMS: Ang International League of Peoples’ Struggle ay nananawagan sa mamamayan ng lahat ng bansa laluna sa rehiyong Asya-Pasipiko na ilantad at labanan ang mga opensibang neoliberal sa pangunguna ng US na lingid na nakaabang sa loob at paligid ng APEC. Partikular tayong nananawagan sa mamamayang Pilipino na mag-organisa at kumilos sa mga pulong pag-aaral at aksyong protesta para tumulong sa lubusang paglalantad ng mga susing pulong ng APEC sa Manila at ibang mga lungsod sa Pilipinas, at pati ng maaasahang kalalabasan ng mga ito. Sadyang isinabay ng ILPS ang Fifth International Assembly sa APEC 2015 para labanan ito sa balangkas ng temang, “Para sa makatarungang lipunan sa daigdig, palakasin ang pagkakaisa ng mamamayan at patindihin ang pakikibaka laban sa imperyalistang pandarambong, krisis at digma”.

Sadyang nananawagan tayo sa kabataang Pilipino na ipagpatuloy na ilantad at labanan ang iba’t ibang pakanang “repormang” neoliberal sa edukasyon, at ipaglaban ang sistema ng edukasyon na tunay na makabayan, syentipíko at makamasa kaugnay ng pambansang industriyalisasyon, tunay na repormang agraryo, at pamamahalang batay sa mga karapatang demokratiko. Kabilang sa mga atas ng kilusang kabataan-estudyante sa Pilipinas ang magsilbing kilusang propaganda para sa pambansang kasarinlan at demokrasya, malalim na makisalamuha sa hanay ng masang manggagawa at magsasaka, at abutin ang mga kababayan nila na nag-aaral at nagtatrabaho sa ibayong dagat, at magpahayag din ng pakikiisa sa pamamagitan ng pagpapatibay ng ugnayan sa mga katapat nila sa anti-imperyalistang pandaigdigang kilusang kabataan.###