Posts

“Huwag pigilan na lumuha”

Ni Arnold Padilla

Huwag pigilan na lumuha

Hindi lahat ng pagtangis

Ay hinagpis

Hindi ba’t mas dalisay

Ang maiyak sa galit

Nang dahil sa pag-ibig

Para sa bayang sawi?

Kaya huwag umiyak

Nang tahimik

Huwag ikubli ang hibik

Sa halip hayaang

Ligaligin ng taghoy

Ang himbing ng gabi.

Hanggang ang bawat

Patak ng luha

Ay maging unos

Hanggang bawat agos

Ay maging daluyong

Hanggang maging sigwa

Na tatapos

Sa muling pagtutuos.

Kaya umiyak ka

Pero huwag malulugmok

Sa lungkot

At sa halip ay

Masiglang bumangon

Sa bawat umaga

Ng tunggalian

At mga hamon –

Gaya noon.

May 10, 2022