Gabi ng Lagim (Tabi-tabi Po)

Ni Ibarra Banaag

Saklot ng takot ang taong bayan.
Nilamon na ng dilim ang katwiran.
Nayungyungan ng itim ang liwanag
Sanhi ng mga budhing tampalasan.

Mananalasa muli ang mga aswang.
Sisipsipin sa sinapupunan ang buhay.
Wala ng isisilang na mga sanggol.
Tanging Inang iniwang humahagulgol.

Maglilipana sa kalye ang tikbalang.
Ng walang takot at may kahambugan.
Upang paslangin sa lansangan.
Mga batang walang kinalaman.

Maghahasik sa lupa mga bampira.
Sasaklutin mga ligaw na kaluluwa.
Sa gayo’y makalikha ng banta sa madla
At mamamayang takot at umid ang dila.

Lilipad na muli ang Babaeng Puti.
Sa mga liblib na sityo at iskenita.
’Wag subukang dumungaw sa bintana.
Kung natatakot na bumulagta.

Dadapong dagli ang manananggal.
Sa bubong na pawid, bintanang sawali.
Bilog ang buwan at walang bituin.
Bingi ang langit sa langitngit ng gabi.

Ngayong may nagbukas na ng banga.
At bendisyon ng oligarkiya.
’Wag magsumbong sa mga pulis.
Pagkat sa Kongreso nagkukweba!

Sadyang sila’y makapangyarihan
Datapuwa’t di para sa taong bayan.
Dahil kakampi ay kadiliman.
Pinakawalan ang halimaw!