Bahag ang buntot
Tula ni Ron Magbuhos Papag
Bahag na ang buntot ng asong ulol
Dati lahat ay inaangilan, kahol ng kahol
Ngayo’y bumubula ang bibig at umaalulong
Nambu-buladas kung hindi nagmamaktol
Hoy, tuta, bistado na ang iyong istilo
Istayl mo bulok, istayl mo bulok!
Hoy, tuta, bistado na inyong gubyerno
Gubyerno niyo bulok! Gubyerno niyo bulok!
Nagkukunwang kaliwa at makabayan
Isa daw sosyalista at maka-mamamayan
Habang hina-hagupit ang taumbayan
Pinapatay ng walang pakundangan
Reporma at pagbabago, ipinagsisigawan
Galit sa mayayaman, negosyante at dayuhan
Habang sakmal tubo ang negosyanteng gahaman
At patuloy ang pangangamkam ng lupa’t likas yaman
Huwag paloloko sa pangakong pagbabago
Ng isang doble-karang tuta’t berdugo
Huwag palilinlang sa salitang mababango
Ng presidenteng himod-pwet sa dayuhang amo